फ्लेचरलाई छ खेलमा प्रतिबन्ध

काठमाडौँ । म्यानचेस्टर युनाइटेडका मिडफिल्डर ज्याक फ्लेचरले खेलको क्रममा समलैंगिकविरोधी शब्द प्रयोग गरेको भन्दै माफी मागेका छन् । उक्त घटनापछि उनलाई छ खेलको प्रतिबन्ध लगाइएको छ ।
इंग्ल्यान्ड अन्डर–१९ टोलीका खेलाडी तथा युनाइटेडका पूर्वखेलाडी ड्यारेन फ्लेचरका छोरा फ्लेचर (१८) लाई अक्टोबरमा बान्स्र्लेविरुद्धको ईएफएल ट्रफी खेलमा ६२औँ मिनेटमा रातो कार्ड देखाइएको थियो । युनाइटेड ५–२ ले पराजित भएको उक्त खेलमा रातो कार्डको कारण तत्काल स्पष्ट थिएन ।
तर, फुटबल एसोसिएसन (फुटबल संघ) ले अब फ्लेचरलाई प्रतिद्वन्द्वीलाई ‘गे ब्वाई’ भनेको कारण मैदानबाट निकालिएको पुष्टि गरेको छ ।
फ्लेचरले भनेका छन्, ‘त्यस क्षणको आवेगमा मैले प्रयोग गरेको अपमानजनक शब्दप्रति म साँच्चिकै माफी चाहन्छु । यस्तो भाषा अस्वीकार्य छ भन्ने मलाई पूर्ण रूपमा बुझिएको छ, र खेलपछि मैले तुरुन्त माफी पनि मागेको थिएँ ।’ उनले उक्त घटनालाई ‘क्षणिक चरित्रच्यूत’ भन्दै यो आफ्नो ‘विश्वास वा मूल्य–मान्यताको प्रतिनिधित्व नगर्ने’ बताएका छन् ।
फ्लेचरले ‘समलैंगिकविरोधी अपमानका रूपमा प्रयोग गर्ने उद्देश्य नभएको’ दाबी गरेका छन् । अनुशासन आयोगले त्यो कुरा स्वीकारे पनि उनलाई छ खेलको प्रतिबन्ध दिनुपर्ने निष्कर्ष निकालेको छ, जसलाई फ्लेचर र क्लबले स्वीकार गरेका छन् ।
उनीलाई १,५०० पाउण्ड जरिवाना पनि गरिएको छ, साथै अनिवार्य प्रत्यक्ष –फेस–टु–फेस) शिक्षा कार्यक्रममा सहभागी हुनुपर्नेछ । कार्यक्रम पूरा नगरे थप निलम्बन हुन सक्ने संघले जनाएको छ ।
संघको लिखित कारणअनुसार, खेलभर प्रतिद्वन्द्वी खेलाडीले फ्लेचर र उनको परिवारबारे टिप्पणी गरेपछि फ्लेचरले उक्त शब्द बोलेका थिए । सो खेलमा फ्लेचरका जुम्ल्याहा भाइ टायलर पनि खेलिरहेका थिए भने ड्यारेन फ्लेचर दर्शकदीर्घामा उपस्थित थिए । फ्लेचरले सोही प्रतिद्वन्द्वीले यसअघि आफूलाई भुइँमा ढालेको र आफ्नो एचिलिसमा टेक्दै चोट पु¥याएको दाबी गरेका छन् ।
म्यानचेस्टर युनाइटेडले फ्लेचरलाई ‘भेदभावपूर्ण भाषाको हानिकारक प्रभावबारे बुझाइ बलियो बनाउन’ सहयोग गरिरहेको र एफएले तोकेको तालिमसँगै क्लबका विविधता कार्यक्रमहरूमा पनि उनी सहभागी भइरहने जनाएको छ ।
युनाइटेडको आधिकारिक एलजीबीटीक्यू+ समर्थक समूह ‘रेनबो डेभिल्स’ ले फ्लेचरको माफीलाई स्वागत गर्दै ‘उद्देश्य वा आशय जे भए पनि, फुटबल र समाजमा समलैंगिकविरोधी भाषा स्वीकार्य छैन’ भनेको छ । समूहले ‘शब्दको अर्थ पर्छ, शब्दले चोट पु¥याउँछ’ पनि उल्लेख गरेको छ ।