नीशा अधिकारीको जम्मा मत ९१

काठमाडौ । गतिशील लोकतान्त्रिक पार्टीका तर्फबाट काठमाडौँ क्षेत्र नं. ५ मा प्रतिनिधिसभा निर्वाचनमा लडेकी ३९ वर्षीया अभिनेत्री नीशा अधिकारी मत पाउने सूचीमा नवौँ स्थानमा रहेकी छन् । 
सो क्षेत्रमा राष्ट्रिय स्वतन्त्र पार्टीका २९ वर्षीय सस्मित पोखरेलले २० हजार ७ सय ३७ मत प्राप्त गर्दै विजयी भए भने उनका निकटतम प्रतिद्वन्द्वी ५० वर्षे प्रदीप पौडेलले जम्मा ९ हजार १ सय ५९ मत प्राप्त गरे ।
नेकपा एमालेका ७२ वर्षीय ईश्वर पोखरेलले जम्मा ४ हजार ७ सय १ मत ल्याएका छन् भने राप्रपाका ७० वर्षीय कमल थापाले १९ सय २२ मत ल्याए । उता उज्यालो नेपाल पार्टीका ४३ वर्षीय श्रीराम गुरूङले १२ सय २८ मत प्राप्त गरेका छन् भने श्रम संस्कृति पार्टीका ३८ वर्षीय अमित थापाले ७ सय ६९ मत ल्याए । यस्तै नेपाली कम्युनिस्ट पार्टीकी ४८ वर्षीया कल्पना शर्माले ५ सय ७४ मत प्राप्त गरिन् भने नेपाल मजदूर किसान पार्टीका ५४ वर्षीय शोभालाल श्रेष्ठले ५७४ मत बटुले ।
यी सारा प्रतिस्पर्धामा भने नीशा अधिकारीले जम्मा ९१ मत प्राप्त गरिन् । त्यसो त उनीभन्दा तल अझै १६ जनाले कम मत प्राप्त गरे । सबैभन्दा कम मत प्राप्त गर्नेहरूमा स्वतन्त्र उठेकी प्रभा श्रेष्ठले जम्मा तीन मत प्राप्त गरेकी छन् ।
अनपेक्षित रूपमा कम मत पाएपछि उनले काठमाडौँ–५ का सम्पूर्ण मतदाताहरूप्रति फेसबुकमार्फत धन्यवाद दिएकी छन् ।
उनले लेखेकी छन्, ‘लोकतन्त्रमा चुनाव केवल जित–हारको प्रतिस्पर्धा मात्र होइन, विचार, एजेण्डा र विश्वासको अभ्यास पनि हो । यस चुनावमा मलाई साथ दिनुहुने, प्रोत्साहन गर्नुहुने, सुझाव दिनुहुने र आलोचना गरेर अझ राम्रो बनाउन खोज्नुहुने सबैलाई म हृदयदेखि धन्यवाद दिन्छु ।’
उनले विजयी भएका सस्मितलाई बधाई तथा सफल कार्यकालको शुभकामना दिएकी छन् । जनताले सस्मितलाई दिएको जिम्मेवारी जनताको हितमा प्रयोग गर्ने आशा व्यक्त गर्दै आफ्नो पक्षमा चुनावको नतिजा जे भए पनि, प्रतिबद्धता भने परिवर्तन नभएको बताएकी छन् । उनले भनेकी छन्, ‘हाम्रो घरदैलो संवाद जारी रहनेछ । नागरिकसँग प्रत्यक्ष संवाद गर्दै, नीति र एजेण्डामा आधारित राजनीति निर्माण गर्ने प्रयास जारी रहनेछ ।’
उनले पछिल्लो परिणामबाट प्रतिनिधि सभाभित्र बलियो प्रतिपक्ष कमजोर हुने सम्भावना रहेको भन्दै यस्तो अवस्थामा नागरिकको आवाजलाई जोगाउन सडकबाट बलियो लोकतान्त्रिक प्रतिपक्षको भूमिका अझ महŒवपूर्ण हुन्छ भनेकी छन् । त्यो जिम्मेवारी निरन्तर निभाउने उनले प्रतिबद्धता जनाएकी छन् ।
यस चुनावको परिणामले महिलाहरूलाई नेतृत्वमा आउन निरुत्साहित गर्नु हुँदैन । बरु यसले हामीलाई अझ धेरै काम गर्नुपर्ने सन्देश दिएको छ भन्दै उनले काठमाडौँ–५ बाट एकदिन महिला प्रतिनिधि संसद्मा पुग्ने सपना अझै जीवित रहेको बताएकी छन् । 
‘त्यो सपना पूरा गर्न म आफ्नो क्षमताअनुसार निरन्तर प्रयास गर्नेछु र अझ धेरै महिलालाई मुख्यधाराको राजनीतिमा अघि ल्याउन काम गर्नेछु,’ उनले भनेकी छन् । राजनीति मेरो लागि पदको यात्रा होइन, सेवा, मूल्यमान्यता र जिम्मेवारीको यात्रा हो भन्दै आफ्नो यात्रा यहाँ नसकिएको र अर्को अध्यायको सुरुवात भएको टिप्पणी गरेकी छन् ।
चुनावमा हार स्वीकारेलगत्तै उनले ‘कस्तुरी’ फिल्मको सुटिङ शुरु गरेकी छन् । चुनावको प्रचार प्रसार र अन्य प्राविधिक अल्झोमा फसेकी नीशालाई ‘कस्तुरी’ फिल्मको टोलीले कुरिरहेको थियो । 
निखिल उप्रेतीको निर्देशनमा तयार हुँदै गरेको यो फिल्ममा लामो समयपछि उप्रेतीसँग काम गर्न पाएकामा नीशाले खुशी प्रकट गरेकी छन् । नीशाको पहिलो फिल्म ‘मिसन पैसा’मा निखिल उप्रेतीकी नायिकाका रुपमा अभिनय गरेकी थिइन् । अहिलेसम्म त्यो बेलाको सुटिङका रमाइला पलहरु भुल्न नसकेको प्रतिक्रिया उनले दिएकी छन् ।