समूह चरणमै रोकिए पनि नेपालले पायो ३ करोड ७७ लाख

काठमाडौं । भारत र श्रीलंकामा हालै सम्पन्न आईसीसी टी–२० विश्वकपमा समूह चरणबाटै बाहिरिएको नेपालले अन्तर्राष्ट्रिय क्रिकेट परिषद् (आईसीसी)बाट दुई लाख ५६ हजार १५४ अमेरिकी डलर (करिब तीन करोड ७७ लाख ५७ हजार रुपैयाँ) पुरस्कार पाएको छ ।
आईसीसीले बुधबार प्रतियोगितामा सहभागी टोलीलाई प्रदान गरिने पुरस्कार रकम सार्वजनिक गर्दै नेपालले उक्त रकम प्राप्त गरेको जनाएको हो । नेपालसँगै इटाली, संयुक्त अरब इमिरेट्स (यूएई) र नेदरल्यान्ड्सले पनि नेपाली टोलीजत्तिनै पुरस्कार पाएका छन् ।
नेपालले विश्वकपमा केही प्रतिस्पर्धात्मक प्रदर्शन देखाए पनि समूह चरण पार गर्न सकेन । टोलीले आफ्ना खेलहरूमा संघर्षपूर्ण प्रदर्शन गर्दै केही खेलमा बलियो प्रतिद्वन्द्वीलाई चुनौती दिएको थियो । युवा खेलाडीहरूको प्रदर्शनले नेपाली टोलीमा सम्भावना रहेको संकेत गरेको क्रिकेट विश्लेषकहरू बताउँछन् ।
आईसीसीका अनुसार यसपटकको टी–२० विश्वकपका लागि कुल एक करोड १२ लाख ५० हजार अमेरिकी डलर पुरस्कार रकम छुट्याइएको थियो । प्रतियोगिताको विजेता भारतले सबैभन्दा धेरै २६ लाख ३९ हजार ४२३ अमेरिकी डलर प्राप्त गरेको छ । फाइनलमा भारतले न्यूजिल्याण्डलाई ९६ रनले हराउँदै लगातार दोस्रो पटक उपाधि जितेको थियो ।
उपविजेता न्यूजिल्याण्डले १४ लाख २२ हजार ६०२ अमेरिकी डलर पाएको छ भने तेस्रो स्थानमा रहेको दक्षिण अफ्रिकाले १० लाख पाँच हजार ५७७ अमेरिकी डलर प्राप्त गरेको छ । सेमिफाइनलमा पुगेको इंगल्याण्डले नौ लाख ७४ हजार ४२३ अमेरिकी डलर हात पारेको आईसीसीले जनाएको छ ।
सुपर आठ चरणसम्म पुगेका टोलीमध्ये वेस्ट इन्डिजले पाँच लाख ३८ हजार २६९, पाकिस्तानले पाँच लाख २२ हजार ६९२, जिम्बाब्वेले चार लाख ९१ हजार ५३८ र श्रीलकाले चार लाख ७५ हजार ९६२ अमेरिकी डलर पुरस्कार प्राप्त गरेका छन् ।
समूह चरणबाटै बाहिरिएका अफगानिस्तान, अष्ट्रेलिया र संयुक्त राज्य अमेरिकाले समान तीन लाख नौ हजार ८०८ अमेरिकी डलर पाएका छन् । यस्तै स्कटल्याण्डले दुई लाख ७८ हजार ६५४ र आयरल्याण्डले दुई लाख ७१ हजार ७३१ अमेरिकी डलर प्राप्त गरेका छन् ।
यसैगरी क्यानडा, नामिबिया र ओमानले समान दुई लाख २५ हजार अमेरिकी डलर पुरस्कार पाएका छन् ।
२० टोली सहभागी उक्त विश्वकपमा नेपालले समूह चरणमा अपेक्षित नतिजा हासिल गर्न नसके पनि अन्तर्राष्ट्रिय स्तरमा अनुभव बटुलेको छ । प्रतियोगिताबाट प्राप्त पुरस्कार रकमले नेपाली क्रिकेटको विकास र तयारीमा सहयोग पुग्ने अपेक्षा गरिएको छ ।