तेस्रो लालबन्दी महोत्सव बुधबारदेखि

सर्लाही । सर्लाहीको लालबन्दीमा कृषि, उद्योग, पर्यटन तथा व्यापार प्रवद्र्धन गर्ने उद्देश्यसहित तेस्रो लालबन्दी महोत्सव–२०८२ आयोजना गरिने भएको छ । उद्योग वाणिज्य संघ लालबन्दीले महोत्सव आयोजना गर्ने महोत्सव लालबन्दी–९ स्थित भूदेव खाद्य उद्योग परिसरमा चैत ४ गते बुधबारदेखि १५ गतेसम्म सञ्चालन गरिने भएको छ । 
एक लाख २० हजार दर्शकले अवलोकन गर्ने लक्ष्य गरिएको महोत्सवको तयारी तीव्र पारिएको छ । अघिल्ला दुई महोत्सवको सफल आयोजनाबाट हौसिएको संघले यो वर्ष पनि निरन्तरता दिन लागेको हो । महोत्सव व्यवस्थापन समितिका संयोजक एवं उद्योग वाणिज्य संघ लालबन्दीका निवर्तमान अध्यक्ष दीपेन्द्रकुमार बलम्पाकीले महोत्सवमार्फत स्थानीय उत्पादन तथा सेवाको बजारीकरण हुने बताए । उनका अनुसार महोत्सवमा १५० वटा हाराहारीमा स्टल छन् ।