हुम्लामा विरुवा उत्पादन भएपछि कृषकलाई सहज

हुम्ला । जिल्ला कृषि विकास कार्यालय हुम्लाले स्याउ र ओखरका बिरुवा वितरण गरेको छ । जिल्लाका कृषकसँग सम्झौता भएअनुसार जिल्ला कृषि विकास कार्यालय हुम्लाबाट स्याउ तथा ओखरका बिरुवा वितरण गर्दै आएको कृषि विकास कार्यालय हुम्लाका प्रमुख चूडामणि पन्तले बताए । 
विगतका वर्षमा जिल्लाबाहिरबाट खरिद गरेर बिरुवा हुम्लामा आइपुग्ने गरेको भए पनि हाल हुम्लाकै विभिन्न कृषि फार्मबाट बिरुवा कृषकलाई सहुलियत दरमा बिक्री हुने गरेको छ । आर्थिक वर्ष २०८२÷८३ का लागि कृषि विकास कार्यालय हुम्लाले सात हजार ओखरका बोट र छ हजार स्याउका बोट खरिद गरी कृषकलाई अनुदान रकममा बिक्रीवितरण गरेको पन्तले बताए ।
स्याउ तथा ओखर विकास कार्यक्रम र स्याउ तथा ओखर बगैँचा स्थापना तथा विकास कार्यक्रम अन्तर्गत कृषि विकास कार्यालय हुम्लाले १० लाख रुपियाँ बराबरको विनियोजित बजेटमार्फत हुम्लाका ६० वटा कृषि फार्मसँग गत माघमा सम्झौता गरेको थियो । सम्झौताअनुसार यतिबेला चंखेलीमा रहेको बागवानी विकास केन्द्र धार्मा देउलीबाट ५ सय ५० स्याउ र ३ सय ५० ओखरका बिरुवा खरिद गरिएको थियो । अन्य बाँकी बोट सर्केगाड, खार्पुनाथ र नाम्खा गाउँपालिकाका कृषकसँग खरिद गरिएको थियो ।
बिरुवा खरिदपछि जिल्ला कृषि विकास कार्यालय हुम्लाले विभिन्न गाउँपालिकामा रहेका कृषि शाखासँग समन्वय गरेर वितरण कार्य सञ्चालन गरिएको थियो । जिल्लाको ताँजाकोट, अदानचुली, चंखेली र सर्केगाड गाउँपालिकालाई केही समयअगाडि पालिकाकै समन्वयमा बिक्रीवितरण गरिएको भए पनि माथिल्लो क्षेत्रका नाम्खा, सिमकोट र खार्पुनाथ गाउँपालिकाका कृषकलाई भने यतिबेला दैनिक बिरुवा लिन आउनेको घुइँचो लाग्न थालेको छ । प्रतिबोट स्याउको १३० रुपैयाँ र ओखरको ५५० रुपैयाँमा बिरुवा बिक्री गर्ने गरेको कृषि विकास कार्यालय हुम्लाले जनाएको छ ।