महाकाली नदीमा व्यावसायिक -याफटिङ

कञ्चनपुर । नेपाल–भारत सीमा नदी महाकालीमा साहसिक जलयात्रा व्यवसायिक रूपमा सञ्चालनमा आएको छ । पानी सप्ताहको अवसर पारेर विभिन्न सरोकारवाला निकायको पहलमा ¥याफ्टिङको व्यावसायिक सुरुवात गरिएको हो ।
महाकाली नदीमा सन् २०२१ मा -याफटिङको सफल परीक्षण गरिएको थियो । कञ्चनपुरको भीमदत्त नगरपालिका–९ मसेट्टीस्थित साइलेट रिभर क्षेत्रबाट -याफटिङ सञ्चालनमा ल्याइएको छ । गैरसरकारी संस्था निड्स नेपालको अगुवाइमा जिल्लास्थित विभिन्न संस्था तथा निजी क्षेत्रसँगको सहकार्यमा प्याकेजमार्फत ¥याफटिङ सेवा उपलब्ध गराइने जनाइएको छ ।
निड्स नेपाल, होटल व्यवसायी संघ, उद्योग वाणिज्य संघ, यातायात समिति, नाटालगायत पर्यटन व्यवसायीहरूको सहकार्यमा -याफटिङ सञ्चालन हुने बताइएको छ । हाल अड्रिफ्ट एडभेन्चर प्रालिअन्तर्गत दुईवटा -याफटिङ बोट सञ्चालनमा ल्याइएका छन् ।
निड्स नेपालका कार्यकारी निर्देशक भवराज रेग्मीले लामो अध्ययनपछि महाकाली नदीमा व्यावसायिक ¥याफटिङ सुरु गरिएको बताए । उनका अनुसार सन् २०१७ मा महाकाली नदीको बहुउपयोग परियोजनाअन्तर्गत -याफटिङको सम्भाव्यता अध्ययन सुरु गरिएको थियो । जसमा अक्सफाम लगायतका विभिन्न साझेदार संस्थाहरूको पनि सहभागिता थियो ।
उक्त अध्ययनअनुसार नेपालतर्फ डडेल्धुराको परशुराम नगरपालिका क्षेत्रबाट करिब १४ किलोमिटर र मसेट्टीदेखि खल्लासम्म आठ किलोमिटर दूरीमा साहसिक जलयात्रा सञ्चालन गर्न सकिने देखिएको थियो । भारततर्फ भने दुईवटा कम्पनीले सन् २०१५ देखि नै नियमित रूपमा -याफटिङ सञ्चालन गर्दै आएका छन् ।
-याफटिङ सञ्चालनका लागि स्थानीय -याफ्टिङ चालक किशन भट्टलाई जिम्मेवारी दिइएको छ । पाँचदेखि १० जनासम्मको समूहले प्याकेज खरिद गरी ¥याफटिङ गर्न सक्ने व्यवस्था मिलाइएको छ । कञ्चनपुर होटल व्यवसायी संघका अध्यक्ष रामचन्द्र रेग्मीले निजी क्षेत्र -याफटिङ सञ्चालन र पर्यटन प्रवर्धनका लागि तयार रहेको बताए ।
नेपाल एसोसिएसन अफ -याफ्टिङ एजेन्सिजका निवर्तमान अध्यक्ष शिव अधिकारीले महाकाली नदीमा -याफटिङको राम्रो सम्भावना रहेको बताए । करिब २५ वर्षदेखि नेपालका ठूला नदीमा -याफटिङ व्यवसाय सञ्चालन गरिरहेका उनले कम जोखिम र सहज जलयात्रा रुचाउने पर्यटकका लागि महाकाली उपयुक्त नदी रहेको उल्लेख गरे ।
नेपाल पर्यटन बोर्डले पनि -याफटिङ पर्यटनको प्रवर्धनमा सहयोग गर्ने प्रतिबद्धता जनाएको छ । भीमदत्त नगरपालिका प्रमुख पदम बोगटीले -याफटिङ प्रवर्धन तथा आवश्यक पूर्वाधार निर्माणमा पालिकाले प्राथमिकता दिने बताए । त्यस्तै दोधरा चाँदनी नगरपालिका प्रमुख किशोरकुमार लिम्बूले पनि -याफटिङको विकास तथा प्रचारप्रसारका लागि पालिका सहकार्य गर्न तयार रहेको बताए ।