विद्यार्थीहरूलाई एआई तालिम

सुनसरी, १३ भदौ - सुनसरीको इटहरी स्थित पाथीभरा सेकेन्डरी स्कुलले विद्यार्थीहरूलाई एआई तालिम दिएको छ । कक्षा ६ देखि ९ सम्मका ८ सयभन्दा बढी विद्यार्थीहरूलाई एआई तालिम दिइएको हो । 

तालिमको सहजीकरण एनपिआईका प्रशिक्षक लिलाराज भट्टराईले गरे । विद्यार्थीहरूमा स्मार्ट अध्ययनको विकास गराउन एआई तालिम दिएको विद्यालयका प्रिन्सिपल डा. गोपाल श्रेष्ठले बताए । 

किताबी ज्ञान मात्र नभई जीवनोपयोगी विभिन्न क्रियाकलापहरूमा आफूहरूले जोड दिएको विद्यालयका अध्यक्ष निर्मल रिजालले जानकारी दिए । अध्ययनमा एआईको सही प्रयोगले विद्यार्थीहरूले घण्टौँ लाग्ने काम मिनेटमा गर्न सक्ने प्रशिक्षक भट्टराईले बताए । 

पाथीभरा स्कुलले सो अवसरमा ८ जना प्रशिक्षकबाट १५ सेसनमा विभिन्न तालिम सञ्चालन गरेको छ । एआईको प्रयोग गरी दैनिक जीवनलाई कसरी सहज बनाउन सकिन्छ भन्ने विषयमा विद्यार्थीहरूलाई प्रशिक्षित गरिएको हो ।