बाबु मजदुरी गर्न साउदी, नेपालमा छोरी सांसद

काठमाडौं । बालविवाह र दाइजोको कुसंस्कारसँग लड्दै हुर्किएकी धनुषाकी रुबी कुमारी अब त्यही समाज परिवर्तन गर्ने लक्ष्यसहित संघीय संसद् पुगेकी छन् । सानैदेखि बिहेका दबाब अस्वीकार गर्दै ‘पहिले देश सेवा, अनि मात्रै बिहे’ भन्ने अडान लिएकी उनी समानुपातिकतर्फ प्रतिनिधिसभा सदस्यमा निर्वाचित भएकी हुन् ।
जनकपुरधाम–१४की रुबी धेरै पटकको प्रतिवादपछि बालविवाहबाट जोगिइन् । सिभिल इञ्जिनियरिङमा अध्ययनरत २५ वर्षीया उनलाई श्रम संस्कृति पार्टीले समानुपातिकतर्फ प्रतिनिधिसभा सदस्य बनाएको हो । निर्वाचन आयोगबाट निर्वाचित भएको प्रमाणपत्र लिएपछि बिहीबार उनले भावुक हुँदै भनिन्, ‘मधेशको बालविवाह र दाइजोप्रथाजस्ता कुसंस्कार हटाउनु छ ।’ 
मधेशका कतिपय परिवारमा छोरीको १६ वर्ष नपुग्दै बिहे गरिदिने चलन छ । छोराहरू रुँदै मजदुरीका लागि विदेशिन बाध्य छन् । रुबीका बाबु पनि १० वर्षदेखि मजदुरीका लागि साउदी अरबमा छन् । अब उनी बुबालाई घर फर्काउन चाहन्छिन् । ‘स्वदेशमै रोजगार भए कसलाई विदेशिन मन लाग्छ र ?,’ उनले भनिन्, ‘स्वदेशमै रोजगार भए, बुबा विदेशिनु पर्थेन । मेरा बुबाजस्ता धेरै नेपाली विदेशमा छन् । उनीहरूलाई स्वदेशमै फर्काउन चाहन्छु ।’
रुबीको अर्को मुद्दा स्वदेशमै युवा रोजगार सिर्जना गर्न आवाज उठाउने रहेको छ । 
प्रतिनिधिसभा सदस्यमा समानुपातिकतर्फ निर्वाचितलाई निर्वाचन आयोगले बिहीबार प्रमाणपत्र दिएको हो । प्रमाणपत्र लिन आउनेमा मधेश प्रदेशकी इञ्जिनियरिङ अध्ययनरत विद्यार्थी रुबीसँगै पूर्व मिस नेपाल अनुष्का श्रेष्ठदेखि कलाकार रिमा विश्वकर्मा समेत छन् । समानुपातिकबाट संसद् पुग्ने  ११० जनामा सबैभन्दा कान्छी रुबी हुन् । समाुनपातिकबाट सांसद् बन्न पाउनेमा रास्वपाका ५७, कांग्रेसका २०, एमालेका १६, नेकपाका ९, श्रम संस्कृति र राप्रपाका ४÷४ जना छन् । 
मुस्लिम समुदायका महिलाका अनुहार पनि सांसदका रुपमा देखिएका छन् । टाउकोमा रुमाल बेरेर काखीमा बच्चा च्यापेर समानुपातिक प्रतिनिधि सदस्यको प्रमाणपत्र बुझ्न आउनुभएकी चितवनकी समिना मियाँले भनिन्,  ‘मुस्लिम महिला लजालु स्वभावका छन्, उनीहरूलाई समाजको मूल प्रवाहमा ल्याउन शिक्षा र स्वास्थ्यमा जोड दिनु आवश्यक ठानेकी छु ।’ भरतपुर–१ की मियाँ रास्वपाको संस्थापक सदस्य हुन् । नर्सिङ पेसामा आबद्ध उनले रुपान्तरणका लागि राजनीतिक चेत आवश्यक भएकाले आफूले परिवार, पेसासँगै संसद् पुग्न जरुरी ठानेको बताइन् । 
नेपाली कम्युनिष्ट पार्टीबाट समानुपातिक प्रतिनिधि सदस्य दाङको घोराहीकी ५० वर्षीया भीमकुमारी बुढामगर सशस्त्र द्वन्द्वको समयदेखि राजनीतिक रुपमा सक्रिय थिइन । उनी पहिलो पटक सांसद भएकी छन् । मगर पहिरनमा सजिएर प्रमाणपत्र बुझ्दै गर्दा उनले गणतन्त्र ल्याउनुमा जसरी आफूले योगदान दिएको हो त्यही ऊर्जा र उत्साह अझै कायम रहेको बताइन । ‘युवाको बाहुल्यता छ, विश्वास छ राम्रै काम गर्छन्,’ उनले भनिन् । 
एमालेकी समानुपातिक सांसद् पद्माकुमारी अर्यालले संसद्मा आफूले जनता र राष्ट्रका पक्षमा हुने सरकारको कामको समर्थन गर्दै विपरीत कार्यको विरोध गर्ने बताइन् । प्रकाशचन्द्र दर्जीले रास्वपाले घोषणा पत्रमा दलित समुदायमाथि राज्यले गरेको अन्यायको माफी माग्ने वाचा पूरा गर्ने बताए ।  सांसद सीता वादीले संसद्मा वादी समुदायको प्रतिनिधित्व गर्दैछिन् । ‘वादी समुदायको बास छैन, गाँस पनि छैन,’ उनले भनिन्, ‘संसद्मा वादीको आवाज सुनाउँछु । उनीहरूको जीवनस्तर उकास्ने प्रयास गर्नेछु ।’ 
गत फागुन २१ मा सम्पन्न प्रतिनिधिसभा सदस्य निर्वाचनमा समानुपातिक निर्वाचन प्रणालीतर्फ निर्वाचित ११० जना सांसद्लाई प्रमाणपत्र वितरण गरिएको हो । (रासस)