एपीएफको प्रभावशाली जित, आसिफको शतकमा बागमती ७१ रनले पराजित

प्रधानमन्त्री कप एकदिवसीय पुरुष राष्ट्रिय क्रिकेट प्रतियोगितामा विभागीय टोली नेपाल एपीएफ क्लबले प्रभावशाली प्रदर्शन गर्दै बागमती प्रदेशलाई ७१ रनले पराजित गरेको छ । काठमाडौंस्थित माथिल्लो मूलपानी क्रिकेट मैदानमा आइतबार भएको खेलमा एपीएफले दिएको २७२ रनको लक्ष्य पछ्याएको बागमती प्रदेश ४५.१ ओभरमा सबै विकेट गुमाउँदै २०० रनमा समेटिएपछि एपीएफ विजयी बनेको हो ।
२७२ रनको चुनौतीपूर्ण लक्ष्यसहित मैदान उत्रिएको बागमती प्रदेशको सुरुआत मध्यम भए पनि नियमित अन्तरालमा विकेट गुमाउँदा टोली लक्ष्यसम्म पुग्न सकेन । बागमतीका लागि विवेक मगरले सर्वाधिक ३४ रन बनाए भने सुबास खत्रीले २७ रन जोडे । उत्तम मगरले २६ रन बनाए भने रिजन ढकालले अविजित २० रनको योगदान दिए । अन्य ब्याट्सम्यानले ठूलो साझेदारी बनाउन नसक्दा बागमती दबाबमा परेको थियो ।
बलिङतर्फ एपीएफका कप्तान रोहित पौडेल र अभिषेक गौतमले उत्कृष्ट प्रदर्शन गर्दै तीन–तीन विकेट लिए । युवराज खत्री, नन्दन यादव र कमलसिंह ऐरीले समान एक–एक विकेट लिएर बागमतीको पारी समेट्न महŒवपूर्ण भूमिका खेले । एपीएफका बलरहरूले सुरुदेखि नै किफायती बलिङ गर्दै विपक्षीलाई दबाबमा राखेका थिए ।
यसअघि टस हारेर पहिला ब्याटिङको निम्तो पाएको एपीएफले निर्धारित ५० ओभरमा ८ विकेट गुमाउँदै २७१ रनको प्रतिस्पर्धात्मक योगफल तयार पारेको थियो । एपीएफको जितमा ओपनर आसिफ शेखको उत्कृष्ट शतक निर्णायक बन्यो । उनले ११४ रन बनाउने क्रममा १४ चौका र तीन छक्का प्रहार गर्दै बागमतीका बलरहरूलाई दबाबमा राखेका थिए । आसिफले संयमित र आक्रामक ब्याटिङको सन्तुलन कायम राख्दै टोलीलाई बलियो अवस्थामा पु¥याएका थिए ।
आसिफलाई सन्दीप जोराले राम्रो साथ दिए । जोराले ५२ रनको महŒवपूर्ण अर्धशतक बनाउँदै मध्यमक्रम सम्हाले । लोकेश बमले २९ रन जोडे भने युवराज खत्री २६ रनमा अविजित रहे । कप्तान रोहित पौडेलले नौ रन बनाए । सुरुआती विकेट गुमाएपछि एपीएफले मध्यमक्रममा साझेदारी बनाउँदै ठूलो योगफल तयार पारेको थियो ।
बलिङतर्फ बागमती प्रदेशका रिजन ढकाल सबैभन्दा सफल रहे । उनले चार विकेट लिएर एपीएफको रनगति रोक्ने प्रयास गरे । इसान पाण्डेले दुई विकेट लिए भने सन्दीप लामिछाने र सोनु देवकोटाले समान एक–एक विकेट हात पारे ।
प्रधानमन्त्री कप एकदिवसीय पुरुष राष्ट्रिय क्रिकेट प्रतियोगितामा यस वर्ष तीन विभागीय टोली नेपाल पुलिस क्लब, त्रिभुवन आर्मी क्लब र नेपाल एपीएफ क्लबका साथै सातै प्रदेशका टोली सहभागी छन् । कुल १० टोली सहभागी रहेको प्रतियोगितालाई नेपाली घरेलु क्रिकेटको सबैभन्दा ठूलो एकदिवसीय प्रतियोगिताका रूपमा लिइन्छ ।
नेपाल क्रिकेट संघ (क्यान)को वार्षिक प्रतियोगिता तालिकाअन्तर्गत आयोजना हुने प्रधानमन्त्री कपलाई राष्ट्रिय टोली छनोटका लागि पनि महŒवपूर्ण प्रतियोगिता मानिन्छ । यस प्रतियोगिताबाट उत्कृष्ट प्रदर्शन गर्ने खेलाडीहरूलाई राष्ट्रिय टोली तथा ‘ए’ टोलीमा अवसर दिइने प्रचलन रहेको छ ।
प्रतियोगिताको विजेता टोलीले रु १० लाख नगद पुरस्कार प्राप्त गर्नेछ भने उपविजेताले रु पाँच लाख पाउने आयोजकले जनाएको छ । व्यक्तिगत विधातर्फ पनि उत्कृष्ट खेलाडी, उत्कृष्ट ब्याट्सम्यान, उत्कृष्ट बलर र उदीयमान खेलाडीलाई पुरस्कार प्रदान गरिने व्यवस्था छ ।
प्रतियोगिता शनिबारदेखि सुरु भएको हो र लिग चरणपछि उत्कृष्ट टोलीहरू सेमिफाइनल तथा फाइनलमा प्रवेश गर्नेछन् । प्रतियोगितामा विभागीय टोलीहरूलाई उपाधिको दाबेदार मानिएको छ भने प्रदेश टोलीहरूले पनि यसपटक कडा चुनौती दिने अपेक्षा गरिएको छ ।
एपीएफले प्रतियोगिताको सुरुआती खेलमै जित निकाल्दै अंकतालिकामा महŒवपूर्ण दुई अंक जोडेको छ भने बागमती प्रदेश पहिलो खेलमै पराजित भएपछि दबाबमा परेको छ । आगामी खेलहरूमा प्रदर्शन सुधार्नुपर्ने चुनौती बागमतीसामु देखिएको छ ।