हैदराबादको सानदार जीत

कोलकाता  । इन्डियन प्रिमियर लिग (आईपीएल) २०२६ अन्तर्गत विहीबार राति इडेन गार्डेन्समा भएको रोमाञ्चक भिडन्तमा सनराइजर्स हैदराबादले घरेलु टोली कोलकाता नाइट राइडर्समाथि ६५ रनको फराकिलो जीत दर्ता गरेको छ । २२७ रनको विशाल लक्ष्य पछ्याएको कोलकाताले सम्हालिएर ब्याटिङ गर्न नसक्दा १६ ओभरमा मात्र १६१ रन जोड्दै आफ्ना सबै विकेट गुमाउन पुग्यो । यो हारसँगै कोलकाताले आफ्नै समर्थकमाझ चुनौतीपूर्ण नतिजा बेहोर्नु परेको छ ।
खेलको सुरुदेखि नै हैदराबादले आक्रामक रणनीति अपनाएको थियो । टस हारेर पहिले ब्याटिङको निम्तो पाएको हैदराबादका लागि ओपनरद्वय अभिषेक शर्मा र ट्राभिस हेडले विष्फोटक सुरुवात दिलाए । अभिषेकले मात्र २१ बलमा ४८ रन बनाउँदै कोलकाताका बलरहरूलाई दबाबमा राखे भने हेडले पनि २१ बलमै ४६ रनको योगदान दिए । पावरप्लेमा बनेको यही बलियो आधारलाई मध्यक्रमका ब्याटरहरूले थप मजबुत बनाए । विशेषगरी हेनरिक क्लासेनले ३५ बलमा ५२ रनको अर्धशतकीय पारी खेल्दै टोलीलाई विशाल योगफलतर्फ डोर्याए । त्यस्तै नितिश कुमार रेड्डीले २४ बलमा ३९ रनको महत्त्वपूर्ण योगदान दिएपछि हैदराबादले निर्धारित २० ओभरमा ८ विकेट गुमाउँदै २२६ रनको विशाल स्कोर खडा ग¥यो । बलिङतर्फ कोलकाताका ब्लेसिङ मुजाराबानीले ४ विकेट लिए तापनि अन्य बलरहरूले रनको गति रोक्न नसक्दा टोली दबाबमा परेको थियो ।
२२७ रनको विशाल लक्ष्य पछ्याउन मैदान उत्रिएको कोलकाताको सुरुवात सोचेजस्तो हुन सकेन । ठूलो लक्ष्यको दबाबका कारण कोलकाताका ब्याटरहरूले लगातार अन्तरालमा विकेट गुमाउन पुगे । युवा खेलाडी अङ्कृष रघुवंशीले २९ बलमा ५२ रनको अर्धशतकीय पारी खेल्दै केही आशा जगाए पनि अन्य अनुभवी ब्याटरहरू क्रिजमा टिक्न सकेनन् । हैदराबादका बलरहरूले कसिलो बलिङ र उत्कृष्ट फिल्डिङ प्रदर्शन गर्दै कोलकाताको पारीलाई १६ ओभरमै १६१ रनमा सीमित गरिदिए ।
यो जीतसँगै हैदराबादले जारी सिजनमा आफ्नो दाबेदारी बलियो बनाएको छ । क्रिकेट समीक्षकहरूले हैदराबादको ब्याटिङलाई “रणनीतिक रूपमा उत्कृष्ट र आक्रामकताको सन्तुलित नमूना“ भन्दै प्रशंसा गरेका छन् । कोलकाताको कमजोर डेथ बलिङ र ब्याटिङमा देखिएको तालमेलको अभाव नै हारको मुख्य कारण रहेको क्रिकेट विश्लेषकले टिप्पणी गरेका छन्  । यो सिजनका अघिल्ला खेलहरूमा दिल्ली क्यापिटल्स, पञ्जाब किङ्स र मुम्बई इन्डियन्सले पनि जीत हात पारिसकेका छन्  । यसले गर्दा यसपटकको आईपीएल अंक तालिकामा निकै प्रतिस्पर्धात्मक देखिएको छ । कोलकाताले अब आफ्नो आगामी खेलमा बलिङ र ब्याटिङ दुवै पक्षमा सुधार गर्नुपर्ने चुनौती देखिएको छ ।