गुणस्तरीय र सिपयुक्त शिक्षामा जोड

काठमाडौँ । गोकर्णेश्वर नगरपालिकाका मेयर दिपक रिसालले गुणस्तरीय तथा सिपयुक्त शिक्षाको विकासबाट रोजगारी सिर्जना गर्न सकिने बताएका छन् । शनिवार जोरपाटीस्थित न्यूटन इन्टरनेशनल कलेजद्धारा आयोजित कार्यक्रममा प्रमुख अतिथिको रुपमा मेयर रिसालले स्थानीयस्तरमा संचालित निजी तथा सामुदायिक सबै खालका शैक्षिक संस्थाहरुको सुधार आवश्यक रहेको बताए  । मेयर रिसालले सबै खालका शैक्षिक संस्थाहरुलाई सहयोग, सहकार्य तथा नजिकबाट सुपरिवेक्षण गरिरहेको बताए ।
कलेजका अध्यक्ष तथा नेपाली सेनाका पूर्व सेनापति प्यारजंग थापाले देश भित्रै रोजगारी र उद्यमशीलताको विकास गर्ने खालको शैक्षिक वातावरण र शिक्षा नीति आवश्यक रहेको बताउँदै स्थानीय तहबाट शिक्षाको विकासमा महत्वपूर्ण सहयोग र सहकार्य पाएको बताए । गुणस्तरीय शिक्षा र प्रविधियुक्त शिक्षालाई प्राथमिकता दिएको अध्यक्ष थापाले बताए । 
कलेजका प्रिन्सिपल दिपेश आचार्यले आजको युग र समय सुहाँउदो शैक्षिक जनशक्ति उत्पादन गर्न कलेज प्रतिवद्ध रहेको उल्लेख गदै गुणस्तरीय र समय सापेक्ष शिक्षामा जोड दिएका थिए ।
त्यसैगरी प्याव्सन गोकर्णेश्वरका अध्यक्ष सुदिप अधिकारीले निजी क्षेत्रले मुलुकको शैक्षिक विकासमा महत्वपूर्ण भूमिका निर्वाह गरेको उल्लेख गदै गोकर्णेश्वर क्षेत्रका शैक्षिक संस्थाहरुमा आपसी सहकार्य रहेको बताए ।
कार्यक्रममा सो क्षेत्रका विभिन्न शैक्षिक संघ संस्थाका प्रतिनिधि तथा स्थानीय शिक्षाकर्मीहरुको सहभागिता रहेको कार्यक्रममा विद्यार्थीहरुले विभिन्न सांँस्कृतिक प्रस्तुती प्रदर्शन गरेका थिए । कलेजले कक्षा ११ १२ देखि स्नातकोत्तर तहका सम्मका विभिन्न शैक्षिक कार्यक्रमहरु संचालन गरेको कलेजले जनाएको छ ।