सवारी लाइसेन्स अब २४ घण्टामै

काठमाडौं । नयाँ सवारी चालक अनुमतिपत्र (लाइसेन्स) अब आवेदन दिएको २४ घन्टाभित्रै छपाई हुने भएको छ । सुरक्षा मुद्रण केन्द्रले नयाँ आवेदनको हकमा अब २४ घण्टाभित्रै छपाइ गरेर उपलब्ध गराउने भएको हो ।
सुरक्षा मुद्रण केन्द्रले अब यातायात व्यवस्था विभागबाट प्राप्त डाटा अनुसार २४ घण्टाभित्र नै छपाई गरी उपलब्ध गराउने व्यवस्था लागू भएको भौतिक पूर्वाधार तथा यातायात मन्त्रालयले जनाएको छ । मन्त्रालयका अनुसार पहिले नै आवेदन दिएर पालो कुरिरहेका नागरिकको हकमा पनि आगामी असारभित्रै छपाई गरेर उपलब्ध गराउने तयारी भइरहेको छ ।
अहिले पालो कुरिरहेका करिब २९ लाख अनुमतिपत्रहरू छपाइका लागि विभागमा उपलब्ध रहेको र ती सबै छिटो छरितो गरी जारी गरिने पनि मन्त्रालयले जनाएको छ । अब नयाँ प्रक्रिया अनुसार सवारी लाइसेन्स आवेदन गर्दा अब लामो समय पर्खनु नपर्ने तथा काम तीव्र गतिमा हुने भनिएको छ । यातायात व्यवस्था विभागले यस नयाँ प्रणालीबाट सेवामा सुधार आउने र नागरिकलाई छिटो सेवा दिने आशा व्यक्त गरेको छ ।