‘राष्ट्रिय लोक, परम्परागत चित्र तथा शिल्प–हस्तकला सम्मेलन’ सुरु

नेपाल ललितकला प्रज्ञा–प्रतिष्ठानको आयोजनामा आजदेखि काठमाडौँमा पहिलो ‘राष्ट्रिय लोककला, परम्परागत चित्रकला तथा शिल्प–हस्तकला सम्मेलन २०८२’ सुरु भएको छ । प्रतिष्ठानका कुलपति नारदमणि हार्तम्छाली तथा अग्रज कलाकार श्यामवदन श्रेष्ठले संयुक्त रूपमा सम्मेलनको उद्घाटन गरे । 

कार्यक्रममा कुलपति हार्तम्छालीले कलामार्फत देशको समृद्धिको विचार मन्थन गर्ने सम्मेलनमा सातै प्रदेशका प्रतिनिधिको उत्साहजनक सहभागिता रहेको बताए । उनले ललितकलामा सौन्दर्यशास्त्र, उपयोगिता र संस्कृति, यी तीन पक्षमा त्रिकोणात्मक सन्तुलन राखी छलफल हुनुपर्ने बताए । 

उपकुलपति लालकाजी लामाले यस सम्मेलनले नेपाली ललितकला क्षेत्रका उन्नयनमा थप सहयोग गर्ने बताए । उनले सबैको हातेमालोबाट यस अभियानले सार्थकता पाउने जिकिर गरे ।

सदस्य सचिव देवेन्द्रकुमार काफ्ले ‘थुम्केली’ले ललितकला तथा पर्यटनसँग कृषि, प्रकृति र संस्कृतिलाई जोडेर लैजानुपर्ने बताउँदै उनले त्यसबाट सिर्जनशील उद्योगको विकासमा सहयोग पुग्ने विचार राखे । साथै उनले विरासतदेखिको संस्कृतिको पुस्तान्तरण र नवयुगको संस्कृति निर्माणमा यस सम्मेलनले थप सहयोग गर्ने बताए । 

शिल्प–हस्तकला विभाग प्रमुख अरुणा हिङमाङले नेपालका शिल्प–हस्तकलाको संरक्षण, सुरक्षा, विकास र पुस्तान्तरणका माध्यमबाट आधुनिकीकरण र बजारीकरणलगायतका विषयमा छलफल गर्नु यस सम्मेलनको मुख्य उद्देश्य भएको बताइन् ।

जानकी गाउँपालिकाका अध्यक्ष गणेश चौधरीले थारू बाहुल्य रहेको कैलाली जिल्लामा थारू लोककलाको अध्ययन, अनुसन्धान तथा अभिलेखीकरणका साथै संरक्षण तथा सम्वर्द्धन हुन जरुरी रहेको बताउँदै विविध कार्यशाला तथा प्रशिक्षणले उत्पादित कलाकारलाई स्थायित्व
दिन विचारविमर्श आवश्यक रहेकामा जोड दिए । 

अग्रज कलाकार श्यामवदन श्रेष्ठले देशका विभिन्न समुदायद्वारा सिर्जित ललितकलाको बजारीकरण, संरक्षण, प्रवर्द्धन र विकासमा सबैले जोड दिनुपर्ने धारणा राखे । उनले कलाको विकास तथा सैद्धान्तीकरणमा गर्नुपर्ने सम्पूर्ण कार्य अहिले समयको माग भएको बताए ।