‘ज्योतिषीय दृष्टिमा सतर्क रहनुपर्ने वर्ष’

ज्योतिष शास्त्रीय दृष्टिमा नयाँ वर्ष २०८३ शुभ फल बढी प्राप्त हुने वर्षका रूपमा रहेकामा ज्योतिषविद्हरूले बताएका छन् । तर, विश्व परिवेश द्वन्द्व र तनावमा धकेलिनसक्ने भएकाले त्यसको असरबाट जोगिन नेपाललाई गाह्रो हुने पनि उनीहरुको भनाइ छ । धार्मिक, सांस्कृतिक पत्रकार समाज, नेपालले नववर्षका अवसरमा मंगलबार काठमाडौंमा आयोजना गरेको ज्योतिष शास्त्रीय शास्त्रीय दृष्टिमा २०८३ कस्तो रहला भन्ने ज्योतिर्विद्हरूसँगको साक्षात्कार कार्यक्रममा सहभागीले यस्तो बताएका छन् । विश्व ज्योतिष महासंघ राष्ट्रिय समिति नेपालका सभापति देवराज गौतमले २०८३ सालमा आठ शुभ ग्रह परेको र सूर्य एवं मंगल गरी दुई मात्र अशुभ ग्रहयोग रहेको जानकारी दिए । लग्नेश चन्द्र र राहु अष्टम भएकाले आगामी वर्ष विश्वमा उतारचढाव बढी हुने उनले बताए । त्यसको प्रभावस्वरूप नेपालमा पनि आरोहअवरोह आउने ग्रहयोग छ ।
‘युरोप र अरबका सैन्य गतिविधि बढ्ने देखिन्छ, खासगरी सैन्यशक्ति वृद्धिको होडबाजीको सम्भावना छ,’ गौतमको भनाइ थियो । शक्ति राष्ट्रहरूबीचको अहम्का कारण विश्व समीकरण बदलिन सक्नेतर्फ उनले बताए । युद्ध र रोगव्याधिको सम्भावना पनि त्यत्तिकै रहेको उनको भनाइ छ । महिला हिंसाका घटनामा पनि वृद्धि हुने, विकसित मुलुकको मुद्रा बलियो र कमजोर मुलुकको झन् कमजोर बन्ने खतराको ग्रहयोग रहेको उनको बुझाइ छ । नववर्षमा मंगल भाग्यमा भएकाले प्रविधिका क्षेत्रमा भने प्रगति हुने अध्यक्ष गौतमको भनाइ छ । 
‘बुध निचो भएकाले व्यापारमा भने कुनै समूहको एकाधिकार रहने देखिन्छ । कला सञ्चार क्षेत्रमा प्रगति हुने देखिन्छ,’ उनले भने । विश्व सेयर बजार बढ्ने ज्योतिषीय प्रक्षेपण उनले गरे । यद्यपि, विलासिताका सामान खरिदमा होडबाजी यथावत् रहने र मूल्य वृद्धिले जनआक्रोश बढ्नेतर्फ गौतमले सचेत गराए । ‘बौद्धिक र सामाजिक क्षेत्रमा खिचलोको वर्ष छ,’ उनले भने, ‘नेपालको सन्दर्भमा केन्द्रित रहेर भन्नुपर्दा आगामी मंसिरसम्म चतुर्थ राहु र दशम् केतुको प्रभावले बौद्धिक र आर्थिक क्षेत्रमा प्रगति भए पनि धार्मिक क्षेत्रमा बाधाको योग रहेको उनले बताए ।
संहिताशास्त्री अर्जुनप्रसाद बास्तोलाले २०८३ सालमा पनि दारुण काल नै चलिरहने भएकाले सतर्क रहनुपर्ने बताए । ‘यो वर्ष दुई दुई वटा खप्पर योग परेको छ, त्यो दारुण कालको अन्त्य देखिएन,’ उनले भने, ‘विश्वमा युद्धका सम्भावनाहरू पनि देखाउँछ यसले । हामी सचेत हुनुपर्छ ।’ दोस्रो विश्वयुद्धका समयमा पनि दारुण काल रहेको भन्दै त्यही स्थिति अब पनि ग्रहहरूले संकेत गरेको उनले बताए । २०८३ मा धार्मिक भावनाहरू झनै ह्रास हुने टिप्पणी  पनि उनले गरे । 
राष्ट्रिय महिला ज्योतिष संघका सचिव सुधा भट्टराईले मंगल सेनापति भएकाले अशान्ति, झगडा, विवादको सम्भावना पनि त्यत्तिकै रहेको बताइन । सँगै यसले परिवर्तनको संकेत पनि गरेको उनको भनाइ छ । मेसिनरी क्षेत्रहरू मंगलले ह्यान्डल गर्ने भएकाले औद्योगिक क्षेत्रमा केही विकास हुनसक्छ । मंगलकै कारण आगामी वर्ष भौतिक उन्नति सँगसँगै उद्योगधन्दाहरूको विकास हुन्छ भने शनि मीन राशिमा भएकाले राम्रा चिजहरूमा देशले कोल्टो फेर्ने उनले बताइन । ‘असारपछि बृहस्पति उच्च स्थानमा जाने भएकाले त्यसपछि मात्रै सुधार हुन्छ,’ भट्टराईले भनिन् । 
ज्योतिषविद् एवम् वास्तुशास्त्री शिवप्रसाद पोखरेलले विश्व परिवेशलाई नियाल्दा आगामी वर्ष विशेष सतर्कता अपनाउनुपर्ने समय भएको भविष्यवाणी गरे । उनले भने, ‘संवत्सर पनि अन्तिम तिरको परेकाले अधम फलदायकको अवस्थामा हामी छौं । राजनीतिक दृष्टिले पनि विश्वका कतिपय मुलुकमा शासन परिवर्तन र शासकहरूबीच मनमुटाव आउनसक्छ । यसले नागरिकहरूबीच असन्तुष्टि पैदा गर्न सक्छ ।’ कृषि उत्पादनमा आर्थिक भार उत्पन्न हुने सम्भावना रहेको भन्दै उनले नेपालको सन्दर्भमा पनि प्राकृतिक र मानव सिर्जित विपत्तिहरू आउनेतर्फ सचेत गराए ।  
ग्रहहरूको उदय र अस्तले पनि ठूलो प्रभाव पार्ने भन्दै पोखरेलले २०८२ वैशाखदेखि आगामी जेठ १८ गतेसम्म बृहस्पति र शनि, मिथुन र मीनमा परस्पर केन्द्रमा रहने र चैत १९ देखि वैशाख २८ गतेसम्म शनि र मंगल एउटै राशि मीनमा भ्रमण गरिरहने हुँदा अनेकन संघर्षका घटना हुनेतर्फ सचेत गराए  । पोखरेलले सिंहदरबार, नारायणहिटी दरबार, दशरथ रंगशालालगायत स्थलका संरचनाको वास्तु नमिलेकाले देशमा समस्या आउने गरेको जानकारी कार्यक्रममा गराए ।
पत्रकार समाजका अध्यक्ष पूर्णप्रसाद मिश्रले धार्मिक तथा सांस्कृतिक पत्रकारहरूको छाता संगठनका रूपमा रहेको संस्थाले आगामी वर्षमा पनि यस्ता अन्तरक्रियात्मक कार्यक्रमहरूका साथै क्षमता विकासका अन्य क्रियाकलापहरूलाई समेत अघि बढाउँदै लैजाने जानकारी गराए । रासस