वैशाख १५ देखि पठनपाठन सञ्चालन गर्न काठमाडौं उपत्यका मेयर्स फोरमको निर्देशन

काठमाडौं । काठमाडौं उपत्यका मेयर्स फोरमले काठमाडौं उपत्यकाभित्रका सबै स्थानीय तहलाई नयाँ शैक्षिक सत्र २०८३ का लागि वैशाख ११ गतेदेखि भर्ना अभियान सञ्चालन गर्न तथा वैशाख १५ गतेदेखि नियमित पठनपाठन शुरु गर्न निर्देशन दिएको छ ।

बुधवार ललितपुरमा बसेको फोरमको आकस्मिक बैठकले यस्तो निर्णय गरेको ललितपुर महानगरपालिकाका प्रमुख चिरिबाबु महर्जनले जानकारी दिए ।

उनले संविधान र स्थानीय सरकार सञ्चालन ऐन, २०७४ अनुसार आधारभुत तथा माध्यमिक शिक्षाको व्यवस्थापन गर्ने अधिकार स्थानीय तहलाई भएको उल्लेख गर्दै विद्यालय स्थापना, सञ्चालन, अनुमति तथा अनुगमन गर्ने जिम्मेवारी स्थानीय सरकारकै रहेको पनि स्पष्ट पारे ।

वैशाख १५ देखि भर्ना खोलेर २१ गतेदेखि पठनपाठन शुरु गर्ने सरकारको निर्णयले विद्यार्थीको सिकाइ उपलब्धि र समग्र शैक्षिक वातावरणमा नकारात्मक असर पार्ने भन्दै फोरमले यस्तो निर्णय गरेको उनको भनाइ छ । उनले राष्ट्रिय गाउँपालिका महासंघ नेपाल, नेपाल नगरपालिका संघ तथा प्रिन्सिपल्स एसोसिएसन अफ नेपाललगायत समन्वयमा उपत्यकाभरी एउटै शैक्षिक क्यालेन्डर कार्यान्वयन गरिने समेत जानकारी दिए । उनले तोकिएको समयसीमाभित्र भर्ना अभियान सम्पन्न गर्न, शैक्षिक क्यालेन्डर कडाइका साथ पालना गर्न र वैशाख मध्यदेखि अवरोधरहित कक्षाकोठा शिक्षण सुनिश्चित गर्न सबै स्थानीय तहलाई आग्रह पनि गरे ।

उनले भने, ‘वैशाख ११ गतेदेखि विद्यार्थी भर्ना गर्ने र बैशाख १५ देखि पठनपाठन शुरु गर्ने निर्णय भएको छ । सोहीअनुसार सरोकारवाला सबैलाई निर्देशन दिन्छौँ ।’

उनले इन्धन अभावको समस्याका कारण विद्यालय सञ्चालन प्रभावित हुनसक्ने अवस्थालाई ध्यानमा राख्दै वैकल्पिक शिक्षण विधि अपनाउन समेत आग्रह गरे ।