दुई जना चिकित्सक पक्राउ, अनुसन्धान जारी

बुटवल । गर्भपतनका क्रममा पाल्पाकी २९ वर्षीया गीता पाण्डेको ज्यान गएको घटनामा जोडिएका बुटवलका दुई डाक्टरसहित पाँच जना पक्राउ परेका छन् । तीन वटा क्लिनिकमा उपचारका क्रममा गीताको मृत्युपछि खत्री नर्सिङ होमका सञ्चालकसमेत रहेका डा. डीबी खत्री र इन्दु लेखा स्वास्थ्य क्लिनिकका डा. सतिश रुपाखेतीलाई प्रहरीले बुधबार नियन्त्रणमा लिएको हो । 
मृतकका पति प्रकाश पाण्डेले गीताको मृत्युमा आर्थिक लाभको उद्देश्य राखेर चिकित्सकले गम्भीर लापरवाही गरेको आरोप लगाई डा. खत्री र रुपाखेतीसहित पाँच जनाविरुद्ध किटानी जाहेरी दिएका छन । दुई डाक्टर अघि प्रहरीले जोनल फार्मेसीकी सन्ध्या बस्नेत र नीलम घर्ती मगर तथा इन्दुलेखा स्वास्थ्य क्लिनिकका सञ्चालक खगेन्द्रप्रसाद पाण्डे मंगलबार नै पक्राउ गरेको थियो । डा. खत्री र रुपाखेती भने आफंै आएपछि नियन्त्रणमा लिइ अनुसन्धान भइरहेको इलाका प्रहरी कार्यालय बुटवलका प्रमुख डीएसपी  निशान्त श्रीवास्तवले बताए । ‘जाहेरी अनुसार तीनजना पक्राउ गरिसक्यौं, तपाइँहरु पनि आउनुस् भनेपछि डाक्टरहरु आउनुभएको हो ’ उनले भने । घटना संवेदनशील रहेकाले प्रहरीले गम्भीर रुपमा लिएर अनुसन्धान गरिहेको उनले बताए । 
पक्राउ परेका पाँचै जनालाई जिल्ला अदालत रुपन्देहीबाट तीन दिनको म्याद थप गरी अनुसन्धान अगाडि बढाइएको इप्रकाले जनाएको छ । पाल्पाको बगनासकाली–२ ख्याहाकी गीता पाण्डे चैत २७ गते खत्री नर्सिङ होममा करिब १२ हप्ताको गर्भ जाँचका लागि आएकी थिइन् । त्यहाँ नर्सिङ होमका सञ्चालक डा. डीबी खत्रीले गर्भ असामान्य छ भनी थप जाँच एवम् उपचारका लागि वैशाख ४ गते बोलाएका थिए । पाण्डे वैशाख ५ गते श्रीमान् प्रकाशसहित नर्सिङ होम आएकी थिइन् । गीताका श्रीमान प्रकाशका अनुसार आफ्नो नर्सिङ होममा नियमित चेकजाँचका गराइरहेकी गीतालाई डा. खत्रीले लोकेसन म्याप दिएर बुटवल अस्पताल लाइनको जोनल फार्मेसी क्लिनिकमा पठाएका थिए । त्यहाँ फार्मेसीले ‘गर्भपतनको १६ हजार शुल्क लाग्छ’ भन्दै २ हजार एड्भान्स लिएर दुईथरि औषधी दिएर अर्को दिन आउन भनेको थियो । 
जोनलबाट फेरि इन्दु लेखा क्लिनिकमा पु¥याई गर्भपतन गराउने क्रममा गीताको मृत्यु भएको थियो । ईन्दु लेखा क्लिनिकमा डा. सतिश रुपाखेतीले गीताको चेकजाँच गरेको पति प्रकाशले बताए । ‘गर्भपतन गराइएको भ्रुण मलाई देखाइएन । गीता बेहोस् भइसकेपछि मलाई थाहा नै नदिइ लुम्बिनी सिटी अस्पतालको इमर्जेन्सीमा लगेछन्,’ उनले भने, ‘त्यहाँ डाक्टरले मृत घोषित गरेका हुन् ।’ रक्त सञ्चार सेवा केन्द्रकी कर्मचारी रहेकी गीतालाई कुनै दीर्घ रोग नभएको र नर्सिङ होम आउँदा स्वस्थ नै रहेको पति प्रकाशको भनाइ छ । गीता पहिलो बच्चा (छोरा) जन्मिएको ५ वर्षपछि दोस्रोपटक आमा बन्ने तयारीमा थिइन् । 
गत आइतबार निधन भएकी गीताको शव लुम्बिनी प्रादेशिक अस्पतालमा छ । किटानी जाहेरी दिइएका पाँच जनालाई प्रहरीले पक्राउ गरे पनि परिवारले गीताको शव उठाएका छैनन् । न्याय नमिलेसम्म शब नबुझ्ने परिवारको भनाइ छ । गीताको मृत्यु भएपछि जोनल फार्मेसीले खत्री नर्सिङ होमले दिएको लोकेशन कार्ड र अन्य उपचारका रिपोर्टहरू लुकाएको आरोप प्रकाशको छ ।