गोरखा संग्रहालयमा एक लाख ३४ हजार पर्यटक

गोरखा । गत वर्ष २०८२ मा एक लाख ३३ हजार ९९१ जनाले गोरखा संग्र्रहालयको अवलोकन गरेका छन् । नेपाल एकीकरणको उद्गम थलोका रूपमा रहेको गोरखामा ऐतिहासिक विषयमा अध्ययन गर्न आउने पर्यटकको संख्या बर्सेनि बढ्दै गएको संग्रहालयका प्रमुख जयनारायण कार्कीले जानकारी दिए । गत वर्ष ३० लाख ४५ हजार राजस्व संकलन भएको उनले बताए ।
‘संग्रहालयको बनोट, यहाँ भएका विषयवस्तु, शाह वंशको इतिहास, नेपाल एकीकरणलगायतका बारेमा अध्ययन गर्न आउने गरेका छन्,’ प्रमुख कार्कीले भने । गत वर्ष संग्रहालय अवलोकन गर्न ४४ हजार ७० विद्यार्थी यहाँ आएका थिए । संग्रहालय घुम्न आउने आमनागरिकको संख्या भने ८७ हजार २१९ रहेको थियो । 
प्रमुख कार्कीका अनुसार यहाँ घुम्न आउनेमा सार्क राष्ट्रका १६० र अन्य विदेशी मुलुकका दुई हजार ५४२ जना रहेका छन् । बर्सेनि यहाँ विद्यार्थीसँगै पर्यटकको संख्या बढ्दै गएको छ । संग्रहालय अवलोकनबापत विद्यार्थीले १०, अन्य नेपाली नागरिकले २५, सार्क राष्ट्रका नागरिकले ५० र अन्य देशका नागरिकले १०० रुपैयाँ शुल्क तिर्नुपर्छ । संग्रहालय साताको सबै दिन खुल्ने व्यवस्था गरिएको प्रमुख कार्कीले जानकारी दिए ।