व्यापारिक कम्प्लेक्स प्रयोगविहीन

सर्लाही । लालबन्दी नगरपालिका–७, डुमडुमेस्थित व्यापारिक कम्प्लेक्स भवन प्रयोगविहीन बनेको छ । नगर विकास कोषको ऋण लगानीमा लालबन्दी नगरपालिकाले निर्माण गरेको व्यापारिक कम्प्लेक्सको २०८१ कात्तिकदेखि भाडामा लागेको थियो । पाँच जना युवाले मिलेर आदित्य कन्स्ट्रक्सनमार्फत भवन सम्झौता गरी भाडामा लिएका थिए तर भवनका कोठा भाडा लगाउनै नसकिएको भन्दै सम्झौता तोडेका छन् । सम्झौता तोडेपछि सो भवन प्रयोगविहीन बनेको हो ।
गत भदौ २४ गते जेनजी आन्दोलनका क्रममा व्यापारिक कम्प्लेक्समा समेत तोडफोड भएको थियो । भवन व्यापार, व्यवसाय गर्नका लागि अनुपयुक्त रहेको भन्दै व्यवसायी र कार्यालय आएर बस्नै नमानेका कारण सम्झौता रद्द गरिएको आदित्य कन्स्ट्रक्सनले जनाएको छ । ठेक्का सम्झौता तोडिएसँगै नगरपालिका कार्यालयले उठ्न बाँकी भाडा कटाएर उक्त कम्पनीलाई धरौटी रकम फिर्ता गरिसकेको छ । भवन ठेक्कामा लिएको कम्पनीसँग ३३ लाख रुपियाँ बैंक धरौटी लिइएको थियो । भवन ठेक्का लिएका पाँच युवामध्ये मोहन भण्डारीले ४६ लाख रुपियाँ घाटा बेहोर्नु परेको गुनासो गरे । भवन ठेक्का लिएपछि व्यवसायी आएर बस्न योग्य बनाउन चेन गेटसहित भित्री संरचना निर्माणका लागि आफूहरूले व्यक्तिगत १६ लाख रुपियाँ खर्च गरेको उनले बताए । ती भित्री संरचना भत्काएर निकाल्दा व्यापारिक कम्प्लेक्सको स्वरूप नै बदलिने भएकाले त्यसको मूल्यांकन गरेर भुक्तानी दिन नगरपालिकासँग माग गरिए पनि सुनुवाइ नभएको भण्डारीको दुःखेसो छ । ‘नगरपालिकाले भनेपछि हामीले भवनबाहिर सडकछेउमा तरकारी पसल बसेको ठाउँको जस्ता र फलामका सामग्री त निकाल्यौं तर हाम्रो लगानी रहेको भित्री सामान निकाल्दा भवनको संरचना नै बिग्रन्छ,’ भण्डारीले भने, ‘त्यसको चाहिँ मूल्यांकन गरिदिनूस् न भनेर कुरा त राख्यौं तर नगरपालिकाले सुनुवाइ गरेन ।’
व्यापारिक कम्प्लेक्समा ठूलाठूला कम्पनी र बैंक तथा वित्तीय संस्था ल्याउन सकिने आसमा ठेक्का सकार गरिएको तर सानो बजारमा माथिल्लो तलामा व्यवसायी बस्नै नमान्ने र बैंकले सरकारी भवन नरुचाउँदा कोठा भाडामा लगाउनै नसकेको अर्का युवा शिवराज धमलाले बताए । भवनमा केही समय आएर बसेका व्यवसायीले समेत भाडा नदिएको धमलाको गुनासो छ । १० वर्षका लागि भाडामा लगाइएको ठेक्का तोडिएसँगै लालबन्दी नगरपालिकाले जेनजी आन्दोलनमा तोडफोड भएको यो भवन मर्मत गरेर पुनः ठेक्का लगाउने तयारी गरेको छ । व्यापारिक कम्प्लेक्स मर्मतका लागि नगर सभाबाट १५ लाख रुपियाँ बजेट विनियोजन गरिसकिएको नगरप्रमुख वासुदेव अधिकारीले बताए । भाडा लगाउने गरी ठेक्का लिएकाले भवनमा आफ्नो लगानीमा संरचना निर्माण गरेकाबारे नगरपालिकालाई कुनै जानकारी नरहेको नगरप्रमुख अधिकारीले बताए ।