जलवीरेको स्वास्थ्य शिविरमा विशेषज्ञ सेवा

सिन्धुपाल्चोक । बलेफी गाउँपालिका–१ जलवीरेमा आयोजित स्वास्थ्य शिविरमा ७ सय ६० जनाले सेवा लिएका छन् ।
जनस्वास्थ्य तथा पोषण प्रवद्र्धन अभियानअन्तर्गत जलवीरे प्राथमिक स्वास्थ्य केन्द्रमा आयोजित शिविरमा विशेषज्ञ चिकित्सकसहित, सामान्य चिकित्सा, बालरोग, नाक, कान, घाँटी, आँखा, दाँत, मुख, क्षयरोगको स्क्रिनिङ गरिएको थियो । शिविरमा सहभागीहरूको एक्सरे सेवा, स्त्री तथा प्रसूति, स्वास्थ्य परीक्षण, उपचार र परामर्श सेवा तथा औषधि प्रदान गरिएको जनस्वास्थ्य कार्यालयका प्रमुख दुर्गा बजगाईले जनाए । गाउँपालिकाका स्वास्थ्य शाखा प्रमुख चेतन घिमिरेले बलेफीको वडा नं ४ मा पनि शिविर आयोजना गरिएको बताए ।
कार्यक्रममा सम्बोधन गर्दै बागमती प्रदेशका स्वास्थ्यमन्त्री किरण थापामगरले जलवीरे प्राथमिक स्वास्थ्य केन्द्रको भौतिक संरचना बनेको बताउँदै अब आधारभूत अस्पतालको रुपमा सञ्चालन गर्न  जनशक्ति, उपकरण लगायतका लागि छिमेकी पालिकाहरुलाई समन्वय सहकार्य गरेर अघि बढ्न आग्रह गरे । गाउँपालिका अध्यक्ष  गंगाबहादुर तामाङले अस्पतालको भौतिक संरचना भए पनि आधारभूत अस्पताल सञ्चालनका लागि जनशक्ति र स्रोत अभाव रहेकाले प्रदेश सरकारलाई सहयोगका लागि आग्रह गरे । कार्यक्रममा वडा नं १ का अध्यक्ष एवं जलवीरे प्राथमिक स्वास्थ्य चौकी व्यवस्थापन समिति अध्यक्ष हुपबहादुर खड्काले आधरभूत अस्पतालको रूपमा सञ्चालनका लागि आवश्यक जनशक्ति र उपकरण अभाव रहेको बताए ।