काभ्रेमा निःशुल्क रगत उपलब्ध गराउने सम्झौता विस्तार

बनेपा । काभ्रेका विभिन्न पालिका, अस्पताल र सहकारी संस्थासँग समन्वय गर्दै रेडक्रसले नागरिक तथा शेयर सदस्यलाई निःशुल्क रगत उपलब्ध गराउने सम्झौता विस्तार गरेको छ ।
बनेपामा आयोजित नेपाल रेडक्रस सोसाइटी काभ्रे शाखाको ४९ औं जिल्ला सभामा सो बताइएको हो । कार्यक्रमका रेडक्रस काभ्रेका सभापति देवेन्द्रप्रसाद भैलले ब्लड बैंकका लागि २ करोड अक्षयकोष स्थापना गर्ने लक्ष्य लिएकोमा हालसम्म ४२ लाख ६० हजार रकम संकलन भएको जानकारी दिए । भैलले काभ्रेका सबै पालिकामा रेडक्रसले अनुरोध गरी माग गरेअनुसार जिल्लाका दुई अस्पताल धुलिखेल र मेथिनकोट तथा बेथानचोक, धुलिखेल, बनेपा, पाँचखाल र मण्डनदेउपुर नगरपालिकाबाट आफ्ना नागरिकहरुलाई निःशुल्क रगत उपलब्ध गराउन सम्झौता भइसकेको बताए । उनले काभ्रेका विन्धवासिनी, सामुदायिक र ज्योतिमिर्मिरे साकोससँग पनि आफ्ना शेयर सदस्यहरुलाई निःशुल्क रगत उपलब्ध गराउन सम्झौता गरेको जानकारी दिए । कार्यक्रममा बनेपा नगरपालिका वडानम्बर ७ का वडाध्यक्ष हिटलर शाक्यले आफ्नो वडाको तर्फबाट १ लाख १५ हजार बराबरको सामग्री हस्तान्तरण गरे । यस्तै बेथानचोक नारी चेतना केन्द्रकी कोषाध्यक्ष शान्ति खत्रीद्वारा २ वटा रक्तदान मेच सहयोग प्रदान गरियो ।