आधुनिक खोप केन्द्र सञ्चालनमा

काभ्रे । काभ्रेको मण्डनदेउपुर नगरपालिकास्थित नगर आधारभूत अस्पतालमा वागमती प्रदेशमै पहिलो वातानुकुलित खोप केन्द्र सञ्चालनमा आएको छ । नगरप्रमुख टोकबहादुर वाइवाले शुक्रबार सो खोप केन्द्रको उद्घाटन गरे । 
मौसमको जस्तो प्रतिकुलता भएपनि संवेदनशील अवस्थामा रहेका आमा र शिशुको स्वास्थ्य अवस्थालाई मध्यनजर गरी विश्व स्वास्थ्य संगठनको मापदण्डमा रहेर वागमती प्रदेशको पहिलो वातानुकुलित खोप केन्द्रको स्थापना गरिएको नगरपालिकाका स्वास्थ्य शाखा संयोजक दिपक घिमिरेले बताए ।
जिल्ला जनस्वास्थ्य कार्यालय धुलिखेलका खोप अधिकृत पार्थमणि न्यौपानेले रोगहरुको जोखिम रहेकाले स्वास्थ्य सेवा प्रवाह गर्दा स्वास्थ्य सतर्कता अपनाउनु पर्ने जोड दिए । उनले बागमती प्रदेशका १ सय १९ वटा पालिका मध्ये मण्डनदेउपुर नगर अस्पतालमा वातानुकुलित खोप केन्द्र सञ्चालनमा आउनु गौरवको कुरा भएको बताए । कार्यक्रममा नगरउपप्रमुख विष्णुमणि नेपालले हाल नगर आधारभूत अस्पतालबाट यो सेवा शुरु भएको र विस्तारै नगरका सबै वडाका खोप केन्द्रहरुमा वातानुकुलित खोप केन्द्र सञ्चालनमा ल्याउने लक्ष्य रहेको बताए । हाल नगरमा ५ शैयाको अस्पताल सञ्चालनमा रहेको र निकट भविष्यमै थप १५ शैयाको अस्पताल सञ्चालनमा ल्याइने उनले बताए । नेपालमै पहिलो पटक रुपन्देही जिल्लाको मायादेवी गाउँपालिकामा वातानुकुलित खोप केन्द्र २०७७ सालमा सञ्चालनमा ल्याइएको थियो । यसपछि नेपालमा विशेषगरी ग्रामीण क्षेत्रका स्वास्थ्य चौकीहरूमा खोपको उचित भण्डारण र सुरक्षाका लागि यस्ता आधुनिक र वातानुकुलित खोप केन्द्रहरूको स्थापना गर्ने क्रम शुरु भएको हो ।