नाफा देख्यो भने मात्र व्यवसायीले जोखिम मोल्छः सतीश गिरी, सदस्य, नेपाल तयारी पोसाक उद्योग संघ

देशमा ठूलो जोखिम मोलेर कसैले पनि लगानी गर्छ भने त्यसको मूल उद्देश्य नाफा कमाउनु नै हुन्छ । तर, राज्यले पनि यसलाई केवल नाफाको दृष्टिले मात्र होइन, समग्र विकास, रोजगारी सिर्जना र दीर्घकालीन आर्थिक समृद्धिको दृष्टिले हेर्नुपर्ने आवश्यकता छ । लगानीकर्ताले सुरक्षित वातावरणमा काम गर्न पाउनुपर्छ, बजारमा सहज पहुँच हुनुपर्छ, र आफ्ना उत्पादन तथा सेवा स्वतन्त्र रूपमा सञ्चालन गर्न सक्ने अवस्था हुनुपर्छ । साथै, उसले तिर्नुपर्ने कर तथा दायित्वहरू पनि स्पष्ट, सरल र झन्झटविहीन रूपमा पूरा गर्न सक्ने प्रणाली हुनुपर्छ । यस्तो वातावरण बनेपछि मात्र लगानीकर्ताले सहज रूपमा लगानी गर्न सक्छ र देशको अर्थतन्त्र पनि मजबुत बन्छ ।
युवाहरू विदेशिनुको सट्टा स्वदेशमै रोजगारी सिर्जना गरेर, उत्पादन गरेर र वितरण गरेर अघि बढ्न सक्ने वातावरण निर्माण गर्नु अहिलेको आवश्यकता हो । एउटा उद्योग सञ्चालन हुँदा प्रत्यक्ष रूपमा केही व्यक्तिले रोजगारी पाउँछन् भने अप्रत्यक्ष रूपमा आपूर्ति शृंखलामा जोडिएका धेरै पक्षहरू लाभान्वित हुन्छन् । एउटा सर्ट उत्पादन गर्न कपडा, सिलाइ, डिजाइन, वासिङ, मार्केटिङदेखि वितरणसम्मको सम्पूर्ण चेन सक्रिय हुन्छ । यसले ठूलो मात्रामा रोजगारी सिर्जना गर्छ र अर्थतन्त्रलाई चलायमान बनाउँछ । त्यसैले लगानीकर्ताको लगानी सुरक्षित हुने, उसको नाफा पारदर्शी रूपमा प्राप्त गर्न सक्ने र कर प्रणाली पनि सहज हुने वातावरण आवश्यक छ ।
म स्वदेशमै ‘मेन्स वेयर’ ब्रान्डमार्फत उत्पादन गर्दै बजार विस्तार गरिरहेको छु । आफ्नै उत्पादन, आफ्नै ब्रान्डिङ र आफ्नै वितरण प्रणालीमार्फत देशभर व्यवसाय सञ्चालन गर्नु देशको लागि अत्यन्त सकारात्मक अभ्यास हो । यस्तो किसिमको स्वदेशी उत्पादनले रोजगारी सिर्जना गर्छ, उद्योग विकास गर्छ र आयात निर्भरता घटाउन सहयोग पु¥याउँछ । विगतका दिनहरूमा जस्तै अब पनि देशले आफ्नै उत्पादनलाई कसरी प्रोत्साहन गर्ने, कसरी स्वदेशमै उत्पादन बढाउने र कसरी उपभोग पनि स्वदेशी उत्पादनमै आधारित बनाउने भन्ने विषयमा गम्भीर रूपमा सोच्न आवश्यक छ । हामीले आफ्नै उत्पादनलाई प्राथमिकता दिँदै उद्योगमैत्री नीति र लगानीमैत्री वातावरण निर्माण गर्न सक्यौं भने त्यो देश र जनताका लागि अत्यन्त लाभदायक हुनेछ ।