विश्वास बिना लगानी आउँदैन, लगानीबिना विकास सम्भव हुँदैनः राधिका हमाल, उपाध्यक्ष, राष्ट्रिय लोक तथा दोहोरी गीत प्रतिष्ठान

युवा नेतृत्वमा रहेको सरकार भएकाले अपेक्षा थियो कि व्यवसायीलाई प्रोत्साहन दिने वातावरण बनाइनेछ । तर, अहिलेको अवस्थामा केही असहजता देखिएको अनुभूति व्यवसायी समुदायमा छ । मेरो बुझाइ के हो भने, सरकारले ‘धरपकड’ भन्दा पनि ‘सुधार र सहजीकरण’ को दृष्टिकोण अपनाउनुपर्छ । किनभने, लगानीकर्तालाई डर देखाएर होइन, विश्वास दिलाएर मात्रै लगानीमैत्री वातावरण बनाउन सकिन्छ ।
राज्यको उद्देश्य नियन्त्रण मात्र होइन, विकास र सहकार्य पनि हो । त्यो काम गर्न चाहने व्यक्तिको पनि निश्चित उद्देश्य हुन्छ र उसले कुनै न कुनै योजना बनाएरै अघि बढिरहेको हुन्छ । तर, त्यसको उद्देश्य नबुझी धरपकड मात्र गर्ने प्रवृत्ति देखिनु राम्रो होइन। यसले समस्या समाधान होइन, झन् जटिलता बढाउँछ । सबैभन्दा महत्त्वपूर्ण कुरा आपसी समझदारी हो । आपसी सहमति र संवादबाट नै हरेक समस्याको समाधान खोज्न सकिन्छ । त्यसैले, विश्वासको वातावरण निर्माण गर्नु आजको मुख्य आवश्यकता हो । विश्वास बिना लगानी आउँदैन र लगानी बिना विकास सम्भव हुँदैन । लगानीकर्तालाई लगानी डुब्ने हो कि भन्ने डर हुनु स्वाभाविक हो । विश्वासको वातावरण छैन भने त्यसैले सरकारले पनि लगानी सुरक्षाको ग्यारेन्टी दिने खालको नीति बनाउन आवश्यक छ भन्ने मेरो धारणा हो । साथै, नागरिक र सम्बन्धित सबै पक्ष पनि जिम्मेवार र उत्तरदायी हुनुपर्छ । विश्वासको संकट होइन, विश्वासको वातावरण निर्माण गर्नु आजको मुख्य आवश्यकता हो । यसका लागि सरकार र निजी क्षेत्रबीच सहकार्य अपरिहार्य छ ।