रात्रिभोज गोलीकाण्डका नाइके एलेन को हुन् ?

वासिङ्टन डिसी, (सीएनएन) । अमेरिकाको वासिङ्टन डीसीस्थित हिल्टन होटलमा आयोजित ‘ह्वाइट हाउस करस्पोन्डेन्ट्स एसोसिएसन’को रात्रिभोजका क्रममा गोली चल्दा निकै तनावपूर्ण स्थिति सिर्जना भएको छ । राष्ट्रपति डोनाल्ड ट्रम्प र उपराष्ट्रपति जेडी भान्सलगायत उच्च अधिकारीहरू उपस्थित रहेको उक्त कार्यक्रममा गोली चलेलगत्तै सुरक्षाकर्मीहरूले उनीहरूलाई मञ्चबाट सुरक्षित बाहिर निकाले । आक्रमणकारीले होटलको मुख्य हल बाहिर रहेको सुरक्षा जाँच बिन्दु नजिकै गोली चलाएको थियो ।
अमेरिकी गुप्तचर निकाय ’सेक्रेट सर्भिस’का अनुसार आक्रमणकारीले सुरक्षा बार तोडेर भित्र छिर्ने प्रयास गरेको थियो । सो क्रममा सुरक्षाकर्मी र बन्दुकधारीबीच गोली हानाहान समेत भएको थियो । घटनामा एक जना सेक्रेट सर्भिसका अधिकारी घाइते भएका छन्, यद्यपि उसको सुरक्षा कवचका कारण ज्यान जोगिएको बताइएको छ । राष्ट्रपति ट्रम्पले सामाजिक सञ्जालमार्फत सेक्रेट सर्भिसको बहादुरीको प्रशंसा गर्दै उनीहरूले उत्कृष्ट काम गरेको बताएका छन् ।
आक्रमणकारीको पहिचान र पृष्ठभूमि
प्रहरीले गोली प्रहार गर्ने व्यक्तिको पहिचान क्यालिफोर्नियाका ३१ वर्षीय कोल टोमास एलेनका रूपमा गरेको छ । एलेन होटलमा पाहुनाका रूपमा कोठा लिएर बसेको थियो, जसका कारण उसलाई होटलभित्र हतियारसहित प्रवेश गर्न सहज भएको अनुमान गरिएको छ । उसको साथबाट एउटा सर्टगन, एउटा पेस्तोल र कैयौँ चक्कुहरू बरामद गरिएको छ । 
सार्वजनिक विवरणअनुसार एलेन पेसाले शिक्षक र भिडियो गेम विकासकर्ता हो । उसले क्यालिफोर्निया इन्स्टिच्युट अफ टेक्नोलोजिबाट मेकानिकल इन्जिनियरिङमा स्नातक र कम्प्युटर विज्ञानमा स्नातकोत्तर गरेको थियो । उसले विद्यालयका लागि आपत्कालीन ह्विलचेयर ब्रेकको नमुना बनाएर प्रशंसा समेत पाएको थियो । हालसम्मको अनुसन्धानमा उसले एक्लै यो घटना घटाएको देखिए पनि उसको वास्तविक उद्देश्य र राजनीतिक झुकावबारे थप अनुसन्धान भइरहेको छ । उसले सन् २०२४ मा कमला ह्यारिसको चुनावी अभियानमा सामान्य आर्थिक सहयोग गरेको विवरण समेत फेला परेको छ ।

सुरक्षा व्यवस्थामाथि गम्भीर प्रश्न
विश्वकै सबैभन्दा सुरक्षित मानिने व्यक्ति सम्मिलित कार्यक्रममा हतियारधारी व्यक्ति कसरी त्यति नजिक पुग्न सफल भयो भन्ने विषयमा अहिले प्रश्न उठेको छ । कार्यक्रममा सहभागी बीबीसीका संवाददाता ग्यारी ओडोनोघ्युले होटल बाहिर सडकहरू बन्द गरिए पनि भित्रको सुरक्षा व्यवस्था फितलो रहेको टिप्पणी गरेका छन् । ढोकामा बस्ने सुरक्षाकर्मीले सामान्य रूपमा मात्र टिकट जाँच गरेको उसको अनुभव छ ।
यसअघि पनि सन् २०२४ को गर्मीयाममा पेन्सिलभेनियामा भएको एउटा चुनावी सभामा ट्रम्पमाथि गोली प्रहार भएको थियो भने फ्लोरिडाको गल्फ कोर्समा पनि उनी आक्रमणको निशानामा परेका थिए । हिल्टन होटलको यो घटनाले अमेरिकी उच्च पदस्थ व्यक्तिहरूको सुरक्षा संयन्त्रमाथि पुनः दबाब बढाएको छ । पूर्व बेलायती राजदूत किम डारोचले होटलका पाहुनाहरूले एउटै सुरक्षा घेरा पार गरेर मुख्य हलसम्म पुग्न सक्ने अवस्था हुनु कमजोरी भएको बताएका छन् ।
अमेरिकामा बढ्दो राजनीतिक हिंसा
यो घटनाले अमेरिकामा पछिल्ला वर्षहरूमा बढ्दै गएको राजनीतिक हिंसाको डरलाग्दो रूपलाई फेरि सतहमा ल्याएको छ । तथ्याङ्कअनुसार सन् २०२३ मा अमेरिकी क्यापिटल हिल प्रहरीले ८ हजारभन्दा बढी धम्कीका घटनाहरूको अनुसन्धान गरेको थियो, जुन सन् २०१८ को तुलनामा ५० प्रतिशतले बढी हो । 
पछिल्ला केही वर्षमा चार्ली कर्कको हत्या, मिनिसोटाका राज्य प्रतिनिधि र सिनेटरहरूमाथिको आक्रमण, र पूर्व सभामुख न्यान्सी पेलोसीका पतिमाथि भएको हमलाले अमेरिकाको राजनीतिक विभाजनलाई उजागर गरेको छ । राष्ट्रपति ट्रम्पले पनि आफूले विगतका राष्ट्रपतिहरूको हत्या प्रयासबारे अध्ययन गरेको र राजनीतिमा आफूलाई जोखिम रहेको महसुस गरेको प्रतिक्रिया दिएका छन् । हाल स्थगित गरिएको यो रात्रिभोज अर्को समयमा आयोजना गरिने बताइएको छ ।