सम्बन्ध नवीकरण गर्दै बेलायती राजा चार्ल्स

वासिङ्टन, (बीबीसी) । बेलायती राजा चाल्र्सले आज अमेरिकी कंग्रेसलाई सम्बोधन गर्दै दुई देशबीचको ऐतिहासिक मित्रतामा ‘मेलमिलाप र नवीकरण’ को नयाँ अध्याय सुरु गर्ने अपेक्षा गरिएको छ । अमेरिकाको चार दिने राजकीय भ्रमणमा रहेका राजाले आफ्नो भाषणमार्फत जस्तोसुकै कठिन र चुनौतीपूर्ण समयमा पनि लन्डन र वासिङ्टन सधैं एकजुट भएको तथ्यलाई स्मरण गराए । सन् २००७ पछि बेलायती राष्ट्रप्रमुखबाट भएको यो पहिलो औपचारिक अमेरिका भ्रमण हो । विशेष गरी अमेरिकी स्वतन्त्रताको २५०औं वार्षिकोत्सवका अवसरमा भएको यो भ्रमणलाई बेलायतले आफ्नो ‘सफ्ट पावर’ कूटनीतिलाई मजबुत बनाउने एउटा ठूलो अवसरका रूपमा लिएको छ ।
राजाको यो भ्रमण यस्तो समयमा भइरहेको छ, जहाँ वासिङ्टन र लन्डनबीचको कूटनीतिक सम्बन्ध केही ओसिलो देखिएको छ । इरान युद्धलाई लिएर प्रधानमन्त्री सर कियर स्टारमरले देखाएको प्रतिक्रियाप्रति अमेरिकी राष्ट्रपति डोनाल्ड ट्रम्पले सार्वजनिक रूपमै असन्तुष्टि व्यक्त गरिरहेका छन् । यस्तो राजनीतिक तनावका बीच राजा चाल्र्सको भ्रमणले दुई देशबीचको रणनीतिक साझेदारीलाई फेरि ट्र्याकमा ल्याउने कोसिस गर्नेछ । राजाले आफ्नो सम्बोधनमा लोकतान्त्रिक मूल्य र मान्यताको रक्षाका लागि नेटोको महŒव र युक्रेनको समर्थनका विषयमा समेत जोड दिने बुझिएको छ ।
वासिङ्टनको सुरक्षा व्यवस्था अहिले निकै कडा पारिएको छ । दुई दिनअघि मात्रै राष्ट्रपति उपस्थित एक कार्यक्रममा भएको घुसपैठ र आक्रमणको प्रयासले सुरक्षा चासो बढाएको हो । राजा चाल्र्सले आफ्नो भाषणमा उक्त घटनाप्रति सहानुभूति प्रकट गर्दै प्रजातन्त्रमा हिंसाको कुनै स्थान नहुने सन्देश दिए । यद्यपि उनी बेलायतको संवैधानिक प्रमुखका रूपमा राजनीतिक रूपमा तटस्थ रहन्छन् तर उनको यो भ्रमणले सरकारको सल्लाहबमोजिम दुई देशबीचको व्यापारिक र सुरक्षा सम्बन्धलाई भावनात्मक रूपमा जोड्ने काम गर्नेछ ।
भ्रमणका क्रममा केही सांकेतिक कूटनीतिक दृश्यहरू पनि रोचक देखिएका छन् । ह्वाइट हाउसमा राजाको स्वागत गर्दा उनको मौरीपालनप्रतिको रुचिलाई ध्यान दिँदै ह्वाइट हाउसकै सानो आकृतिमा बनाइएको मौरीको घार देखाइएको थियो । त्यस्तै, रानी क्यामिलाले लगाएको ऐतिहासिक ब्रुचले सन् १९५० को दशकमा स्वेज संकटपछि सुधारिएको सम्बन्धको सम्झना दिलाएको छ । दूतावासमा आयोजित कार्यक्रममा पहिलो पटक करमुक्त सम्झौताअन्तर्गत आयात गरिएको बेलायती गोमांसका स्यान्डविचहरू खुवाइयो, जसले दुई देशबीचको आर्थिक सहकार्यको नयाँ सुरुवातलाई संकेत गरेको छ ।
पीडित पक्षहरूका केही गुनासा र दबाबका बीच हुन लागेको यो कांग्रेस सम्बोधनले बेलायती राजसंस्था र अमेरिकी संसद्बीचको ऐतिहासिक कडीलाई फेरि एकपटक विश्वमाझ प्रदर्शन गर्नेछ । सन् १९९१ मा रानी एलिजाबेथ द्वितीयले सम्बोधन गरेपछि दुवै सदनलाई सम्बोधन गर्ने चाल्र्स पहिलो बेलायती राजा हुनेछन् । आजको सम्बोधन र त्यसपछि ह्वाइट हाउसमा हुने राजकीय भोजले ट्रम्प प्रशासन र स्टारमर सरकारबीचको असमझदारीलाई कम गर्दै साझा भविष्यका लागि एउटा बलियो आधारशिला निर्माण गर्ने अपेक्षा गरिएको छ ।