भीरबाट गाडी खस्दा २० जनाको मृत्यु

काठमाडौं । रोल्पामा तीर्थालु सवार जिप पल्टिँदा २० जनाको मृत्यु भएको छ । पूर्वी रुकुमबाट वैशाख पुर्णिमाको जलजला मेला भर्ना जाँदै गरेका यात्रु चढेको जिप थवाङ–१ सल्यापस्थित थवाङ–जलजला कच्ची सडकखण्डमा बिहीबार दुर्घटना भएको हो ।
जिल्ला प्रहरी कार्यालय रोल्पाका अनुसार लु१ज ४१६७ नम्बरको जिप सडकबाट करिब ८ सय मिटर तल भीरमा खसेको हो । यात्रुहरु अधिकांशको घटनास्थलमै मृत्यु भएको अनुमान छ । घाइते अवस्थामा उद्धार गरिएका पूर्वी रुकुमको सिस्ने–५ का ३२ वर्षीय समीर कामीले गाडी पल्टिएपछि आफू भिरालोमा हाम फालेर रुखको जरा समातेर बाँचेको बताएका छन् । उनको थपाङस्थित जलजला आधारभूत अस्पतालमा उपचार भइरहेको छ । 
जिल्ला प्रहरी कार्यालय रोल्पाबाट डीएसपी वीरेन्द्र विश्वकर्माको कमाण्डमा ट्राफिक सहित १० जना, सशस्त्र प्रहरी बल आश्रित गुल्म रोल्पाबाट डीएसपी दीपेन्द्रकुमार पाण्डेको कमाण्डमा ११ जना र नेपाली सेनाको सूर्य दल गण लिवाङबाट सेनानी शिशिर ठकुरीको कमाण्डमा १० जनाको टोली घटनास्थलमा खटिएको थियो । थबाङ इलाका प्रहरी कार्यालयबाट झन्डै १५ किलोमिटर र जिल्ला सदरमुकाम लिबाङबाट झन्डै ८५ किलोमिटर टाढाको घटनास्थलमा सुरुमा १८ जनाको शव भेटिएको थियो, पछि खोजी कार्य गर्दै गर्दा थप दुई जना मृत भेटिए । अँध्यारो र भिरालो ठाउँ भएकाले राति उद्धार कार्य गर्न नसकिने भएकाले २० जनाको शव संकलन गरी घटनास्थलमा सुरक्षित राख्नुका साथै सनाखत भइरहेको प्रहरीले जनाएको छ ।  
यसैबीच गृह मन्त्रालयले उक्त दुर्घटनाको छानबिन गर्न समिति गठन गरेको छ । मन्त्रालयले सचिवस्तरको निर्णयाबाट लुम्बिनी प्रदेश प्रहरी कार्यालय तुलसीपुरका प्रहरी उपरीक्षक यादव ढकालको संयोजकत्वमा चार सदस्यीय समिति गठन गरेको हो । समितिमा रोल्पाका नेपाल प्रहरी र सशस्त्रका डीएसपीहरु र जिल्ला प्रशासन कार्यालय प्रशासकीय अधिकृत सदस्य रहेको सूचना अधिकारी रमा आचार्य सुवेदीले जानकारी दिइन । समितिलाई घटनाको छानबिन गरेर तीन दिनभित्र प्रतिवेदन पेस गर्ने जिम्मेवारी दिइएको छ । समितिलाई दुर्घटनाको कारण तथा लापरबाही र कमजोरी पत्ता लगाई तथा आगामी दिनमा दुर्घटना न्यूनीकरणका लागि चाल्नुपर्ने कदमबारे सुझाव दिने कार्यादेश दिइएको छ ।