बिनाविकल्प विस्थापनको डरले त्रसित सुकुमवासी

महोत्तरी । धनुषाको गणेशमान चारनाथ नगरपालिका–७, पोर्ताहास्थित कमला सुकुमवासी बस्तीका बासिन्दा यतिबेला त्रसित भएका छन् । देशभरका सुकुम्बासी वस्तीमा बालेन सरकारले डोजर चलाइरहेको दृश्य देखेका यहाँका वासिन्दा कहिले डोजर आउला भनेर त्रसित भएका छन् ।
कमला सिँचाइ व्यवस्थापन कार्यालय धनुषाले गत वैशाख ३ गते बस्ती खाली गर्न सूचना जारी गरेपछि सो बस्तीका बासिन्दा त्रासमा परेका हुन् । तीन बिघामा फैलिएको बस्तीमा विगत १२ वर्षदेखि करिब ४५ परिवार कच्ची घर निर्माण गरी बसोबास गर्दै आएका छन् । बस्तीमा पासवान, मण्डल, साह, विक तथा मुस्लिम समुदायका विपन्न परिवारको बसोबास रहेको छ ।
स्थानीय प्रमोद साहले वैदेशिक रोजगारीका कारण ऋणको बोझले पुख्र्यौली घरजग्गा बेचेपछि सुकुमवासी बन्नु परेको पीडा व्यक्त गरे । साबिकको घर महोत्तरीको रतौली भएको बताउँदै उनले भने, ‘दुई पटक वैदेशिक रोजगारीमा गएँ । पहिलो पटक मलेसिया गएँ । कम्पनी नै बन्द भयो । दोस्रो पटक कतारमा बिरामी परेर फर्किनु प¥यो । वैदेशिक रोजगारीमा जाँदा लिएको ऋण तिर्न बुवाले दिएको पाँच कट्ठा जमिन बेच्नुपरेको छ ।’ साहले घरजग्गा बेचेपछि यहाँ बस्न थालेको बताउँदै अहिले फेरि हट्नुपर्ने अवस्थाले परिवारको भविष्य अन्योलमा परेको उनको भनाइ छ ।
वस्तीमा बस्दै आएकी स्थानीय प्रमिला देवीले आफ्नो १० जनाको परिवार यही बस्तीमा आश्रित रहेको बताउँदै सरकारसँग पुनर्वासको माग गरिन् । उनी भन्छिन्, ‘हामी गरिब मान्छेको बस्ने ठाउँ छैन । यहाँबाट हटाएपछि बालबच्चासहित कहाँ जाने ? सरकारले विकल्प दिनु पर्छ ।’ यहाँको समस्या जनप्रतिनिधिसमक्ष राखेको बताउँदै स्थानीयले चित्तबुझ्दो आश्वासन नदिएको उनले गुनासो गरिन् । 
नगरप्रमुख जितनारायण यादव र वडाध्यक्षले बस्ती खाली गराएपछि विकल्प खोज्ने बताउँदै आएका छन् । सुकुमवासीले बिनाविकल्प नहटाउन र हटाउनै परे उचित क्षतिपूर्ति वा पुनर्वासको सुनिश्चित गर्न माग गरेका छन् । बर्सौंदेखि बसोबास गर्दै आएको थातथलोबाट एक्कासि विस्थापित हुनुपर्ने अवस्थाले सबै चिन्तित देखिएका छन् । कमला सिँचाइ व्यवस्थापन कार्यालयका प्रमुख रन्धिरकुमार साहले सरकारी जग्गामा भएको अवैध अतिक्रमण हटाउने अभियान अन्तर्गत सूचना जारी गरिएको बताए । उनले कार्यालयमातहतको जमिन अतिक्रमण गरी बसेकालाई हटाउन लागिएको स्पष्ट पारे ।