चुरे–महाभारत क्षेत्रमा बढ्दो खानेपानी संकट

कटारी । सुक्खा मौसमका कारण जमिनमुनिको पानीको मुहान सुक्दै गएपछि चुरे तथा महाभारत पहाडको फेदीआसपासका गाउँमा खानेपानीको अभाव हुन थालेकोे छ । खडेरीसँगै सतहमुनिको पानीको स्रोत सुक्न थालेपछि जिल्लाको कटारी नगरपालिका–८ को वर्मी र वडा नं. ६ को बगपतिगाउँमा खानेपानीको अभाव भएको हो । स्थानीय चिसापानखोलाबाट पोलिथिन पाइपमार्फत गाउँमा ल्याइएको १२ वर्ष पुरानो योजनाको मुहान सुकेपछि कटारी–८ को वर्मीगाउँका बासिन्दालाई सुक्खायाम सुरु भएसँगै खानेपानीको संकट पर्न थालेको स्थानीय उपभोक्ता बताउँछन् ।
सिद्धिचरण लोकमार्गको कटारी–घुर्मी खण्डमा पर्ने सो गाउँमा बसोबास गर्दै आएका ५० घरपरिवारका करिब छ सय उपभोक्तालाई स्वच्छ खानेपानीको अभाव भएपछि गाउँनजिकैको जंगलमा रहेको पुरानो कुवाको दूषित पानी खानुपर्ने बाध्यता भएको स्थानीय धनबहादुर परियार बताउँछन् । सो गाउँमा घरपालुवा पशुचौपायालाई समेत खानेपानीको समस्या चर्किएको छ । जंगलको बिचमा रहेको पुरानो कुवाका भरमा ५० घरपरिवारका मानिस र उनीहरूले पालेका गाईभँैसी, बख्रा, सुँगुरलगायतका घरपालुवा जनावरलाई खानेपानीको जोहो गर्नुपर्ने बाध्यता आइपरेको परियारले बताए ।
गाउँमाथिको हरिया डाँडामा कसमस सिमेन्ट उद्योगले खानी उत्खनन गर्न जथाभावी रूपले डोजर र एक्साभेटर चलाएर पूरै जंगल उजाड पारेपछि पुस्तौँदेखि स्थानीयले उपभोग गर्दै आएका कुवा, पँधेरो जस्ता खानेपानीका स्थायी मुहान पनि एकपछि अर्काे गर्दै धमाधम सुक्न थालेकाले आफूहरूलाई यस्तो समस्या आइपरेको उपभोक्ताको गुनासो छ । पानीका स्रोत धमाधम सुक्दै गएपछि गाउँलेलाई बोलाएर पुराना कुवालाई सफा गरी मुहान संरक्षणमा लागेको भन्दै स्थानीय उपभोक्ताका अगुवा धनबहादुर परियारले भने, ‘गाउँ छाडेर अन्यत्र बसाइँ जाऊँ भने जाने ठाउँ छैन, नजाऊँ भने गाउँमा बाँच्नका लागि नभई नहुने खानेपानीको स्रोत छैन, कस्तो आपत् आइलाग्यो ।’
बर्सांैदेखि स्वच्छ खानेपानीको अभाव झेल्दै आएका वर्मीलगायत त्यस क्षेत्रका अन्य कतिपय गाउँबस्तीमा यस वर्ष पनि खानेपानीको कुनै पनि योजना नभएको कटारी नगरपालिकाका प्रवक्ता प्रेमबहादुर क्षेत्रीले बताए । त्यसै गरी वडा नं. ६ को बगपतिगाउँमा पनि खानेपानीको मुहान सुक्न लागेको स्थानीयको भनाइ छ । करिब ४० घरपरिवारको बसोबास रहेको सो गाउँका उपभोक्ता स्वच्छ पानीको अभावमा इनार, कुवाको दूषित पानीबाट दैनिक गुजारा गरिरहेको वडा नं. ६ का वडाध्यक्ष पूर्णबहादुर मगरले बताए । बजेट अभावमा खानेपानीका योजना बनाउन नसकिएको उनको भनाइ छ ।
२५२ घरपरिवारको बसोबास रहेको ती गाउँमा पानीको विकराल समस्या भएकाले पालिकाले सुक्खाग्रस्त क्षेत्र घोषणा गरी राहत र दिगोपना हुने विशेष कार्यक्रम सञ्चालन गर्न आवश्यक रहेको स्थानीय उपभोक्ता कुन्ता कार्कीले बताइन् । योजनाका पुराना धारा गाउँमा भए पनि मुहान सुकेकाले पानी आउँदैन । स्थानीयका अनुसार २०७२ सालको भूकम्पपछि खानेपानीको मुहान सुक्न थालेको हो ।