खोटाङमा आइतबार स्कुल खुल्ने

दिक्तेल । संघीय सरकारले विद्यालयलाई शनिबार र आइतबार बिदा दिने निर्णय गरे पनि सो निर्णय गाउँठाउँमा उपयुक्त नभएको गुनासो आइरहेको सन्दर्भमा खोटाङका जिल्लाका तीन पालिकाले भने आइतबार आइतबार विद्यालय सञ्चालन गर्ने भएका छन् । खोटाङ जिल्लाका तीन स्थानीय सरकार दिक्तेल, रूपाकोट, मझुवागढी नगरपालिका, खोटेहाङ र दिप्रुङ चुइचुम्मा गाउँपालिकाले संघीय सरकारको घोषणा विद्यालयमा लागू गर्न नसकिने जनाउँदै आइतबार पनि विद्यालय खुलाउने निर्णय गरेको हो ।
नेपाल सरकार, मन्त्रीपरिषद्को गत चैत १२ गतेको बैठकले शनिबार र आइतबार हप्ताको दुई दिन सार्वजनिक बिदा दिने निर्णय गरेको थियो । मन्त्रीपरिषद्को निर्णय अनुसार शिक्षा तथा मानव स्रोत विकास केन्द्र सानोठिमी भक्तपुरले गत चैत २६ गते ७७ वटै जिल्लामा सरकारले दिएको निर्देशन पालना गर्न पत्राचार गरेको थियो । अहिलेको पाठ्यक्रम अनुसार नेपाल सरकारले दिएको दुई दिनको सार्वजनिक बिदाले निर्धारित पाठ्यभार पूरा गर्न नसकिने भन्दै आइतबार पनि गाउँपालिकाभित्रका सबै विद्यालयमा पठनपाठन गर्ने खोटेहाङ गाउँपालिकाले निर्णय गरेको छ । वैशाख २१ गतेबाट मात्र विद्यालय पठनपाठन सुरु गर्ने सरकारको निर्देशन भए पनि गाउँपालिकाले भने १५ गतेदेखि नै पठनपाठन सुरु गरेको छ ।