‘डिजिटल नेपाल बनाउन इम्बोस्ड नम्बर जरुरी’

काठमाडौं । भौतिक पूर्वाधार तथा यातामन्त्री देवेन्द्र दाहालले डिजिटल नेपाल बनाउन सवारीमा इम्बोस्ड नम्बर जरुरी भएको बताएका छन् । संघीय संसदको बिहीबारको बैठकमा शून्य र विशेष समयमा उठेका प्रश्नको जवाफ दिँदै उनले सवारीमा एम्बोस्ड नम्बरका लागि सम्झौता पहिले नै भइसकाले अब सवारीधनीले अनिवार्यरूपमा जडान गर्नैपर्ने बताएका हुन् ।

‘सवारीसाधनमा इम्बोस्ड नम्बर जडान गर्नका लागि तीन पटकसम्म सम्झौता भएको देखिन्छ, वर्तमान सरकारले सम्झौता गरेको होइन । जडान नगर्ने हो भने तीन अर्ब पैसा सित्तैमा निर्माण कम्पनीलाई दिनुपर्ने हुन्छ,’ उनले भने । 

उनले पहिला नै सम्झौता गरिएको र कुनै चिज उत्पादन नगरिकन पैसा तिर्न‘पर्ने भएकाले वर्तमान सरकारले इम्बोस्ड नम्बर राख्नुपर्ने आवश्यकता परेको बताए । उनले भाषा अंग्रेजीमा हुँदा कुनै पनि फरक नपर्नेसमेत दाबी गरे । 

मन्त्रालयले यस प्रक्रियालाई अघि बढाएको जानकारी दिँदै उनले व्यक्तिगत, निजी वा सरकारी सवारी साधनका लागि अहिलेसम्म ६ लाख ३५ हजार ५ सय ४५ वटा नम्बर छपाइ भइसकेको र ८७ हजार ९८९ इम्बोस्ड नम्बर जडान भइसकेको जानकारी दिए । 

‘नेपाल सरकारले डिजिटल नेपालको अवधारणालाई आत्मसात गर्दै सरकारका तर्फबाट प्रवाह हुने सेवाहरू राहदानी, राष्ट्रिय परिचयपत्र, सवारीचालक अनुमतिपत्र, जग्गादर्ता लगायतका क्षेत्रमा गरेको अवस्था छ,’ उनले भने, ‘सो अनुरुप यातायात क्षेत्रलाई पनि डिजिटल क्षेत्रमा लैजानुपर्ने जरुरी छ । इम्बोस्ड नम्बर प्लेट जडान गरेपछि देशभरका सवारीसाधनको एकीन विवरण हुनेछ ।’ 

उनले सवारी इजाजतका बारेमा एकिन विवरण हुने, सवारीसाधन चोरी, राजस्व छलिका विषयमा रोक्न पनि सहज हुने र सवारी साधानमा इम्बोस्ड नम्बर जडान गर्न निर्देशिकासमेत जारी भएको बताए । मन्त्री दाहालले सवारीसाधनको पहिचानका लागि संकेत नम्बर प्रविधिको कारण अंग्रेजी भाषामा राख्नुपर्ने हुँदा अन्तरदेशीयरुपमा आवतजावतमा सहयोग पुग्ने जिकिर गरे ।