कामिरिता ३२औं पटक सगरमाथा चुचुरोमा

काठमाडौं । विश्वविख्यात आरोही कामिरिता शेर्पाले ३२औं पटक सगरमाथाको सफल आरोहण गरेका छन् । सोलुखुम्बुको थामेका ५६ वर्षीय शेर्पाले आइतबार बिहान १०ः१२ बजे शिखरमा पुगेका हुन् ।    सर्वोच्च शिखरमा सबैभन्दा धेरै पुग्ने आफ्नै कीर्तिमानलाई उनले सच्याउँदै इतिहास बनाएका हुन् । यसअघि सेभेन समिट ट्रेकमार्फत सगरमाथा चढ्दै आएका उनले यसपटक फोर्टिन पिक्स एक्सिपिडिसनमार्फत सञ्चालित एडभेन्चर–२४ फोर्टिन पिक्स एभरेष्ट एक्सिपिडिसनको नेतृत्व गर्दै ऐतिहासिक सफलता हासिल गरेका हुन् । 
सन् १९९४ मा पहिलो पटक सगरमाथाको शिखरमा पाइला टेकेका  कामिरितालाई विश्वभर ‘एभरेष्ट म्यान’का रुपमा चिन्ने गरिन्छ । फोर्टिन पिक्स एक्सिपिडिसनका संस्थापक टासी लाक्पा शेर्पाले कामिरिताको उक्त उपलब्धि नेपाल र विश्व पर्वतारोहण समुदायका लागि गौरवको विषय भएको बताए । ‘कामिरिताको यो उपलब्धि केबल व्यक्तिगत सफलता मात्र नभई नेपालको शान र हिमालको भावनालाई विश्वमाझ पु¥याउन एउटा ठूलो माध्याम हो,’ उनले भने । 

महिला आरोही लाक्पा ११औं पटक 
यसैबीच महिला आरोही लाक्पा शेर्पाले ११औं पटक सगरमाथा आरोहण गरेकी छन् । संखुवासभाको मकालुकी लाक्पाले आइतबार बिहान ९ः३० बजे ११ औं पटक सगरमाथाको चुचुरोमा पाइला टेकेकी हुन् । 
महिला आरोही सगरमाथा चढेको यो नै सबैभन्दा धेरै पटक भएको पर्यटन विभागले जनाएको छ । यसअघि लाक्पाले सन् २०२२ मा १०औं पटक सगरमाथा आरोहण गरेकी थिइन । त्यसबेला उनले आफ्नै नाममा रहेको नौ पटक सगरमाथामा पुग्ने महिला आरोहीको कीर्तिमानलाई नयाँ बनाएकी थिइन । हालसम्म कम्तीमा सात हजार आरोहीले १२ हजार पटक सगरमाथा चुचुरोको सफल आरोहण गरिसकेका छन् ।