अमेरिकाले सैन्य कारबाही गरे ‘रक्तपात’ : क्युबा

हवाना, (सीएनएन)  । क्युबाका राष्ट्रपति मिगेल डियाज–कानेलले सोमबार अमेरिकाले क्युबामाथि सैन्य हमला गरे ‘अकल्पनीय परिणामसहितको रक्तपात’ हुने चेतावनी दिएका छन् । हवाना र वासिङ्टनबीच तनाव पुनः चर्किरहेका बेला उनले यस्तो अभिव्यक्ति दिएका हुन् ।
‘क्युबाले कुनै देशलाई खतरा दिएको छैन, न त कुनै देशविरुद्ध आक्रामक योजना वा उद्देश्य राखेको छ । अमेरिकाविरुद्ध पनि त्यस्तो कुनै योजना कहिल्यै थिएन, र त्यो कुरा अमेरिकी सरकारले राम्रोसँग जान्दछ,’ उनले एक्समा लेखेका छन् ।
डियाज–कानेलले क्युबा ‘पहिल्यैदेखि अमेरिकाको बहुआयामिक आक्रमणको सामना गरिरहेको’ उल्लेख गर्दै सैन्य हमलाविरुद्ध आफ्नो रक्षा गर्ने ‘पूर्ण र वैध अधिकार’ क्युबासँग रहेको बताए । तर उनले यस्तो अधिकारलाई ‘क्युबाली जनतामाथि युद्ध थोपर्ने बहाना’ बनाउन नहुने पनि स्पष्ट पारे ।
अमेरिकी राष्ट्रपति डोनाल्ड ट्रम्पको नयाँ दबाब र क्युबामा गहिरिँदो ऊर्जा संकटका कारण दुई देशबीचको सम्बन्ध दशकयताकै कमजोर अवस्थामा पुगेको छ । गत साता क्युबाका ऊर्जा मन्त्रीले रुसबाट आएको अन्तिम क्षणको तेल सहयोग सकिएको र अब नागरिकले थप विद्युत कटौती सहनुपर्ने बताएका थिए ।
सोमबार ट्रम्प प्रशासनले क्युबाको मुख्य गुप्तचर निकाय र गृह मन्त्रालयसहित सरकारमाथि नयाँ प्रतिबन्ध घोषणा ग¥यो । अमेरिकी विदेशमन्त्री मार्को रुबियोले आगामी दिन र साताहरूमा थप प्रतिबन्ध आउने संकेत दिएका छन् ।
अमेरिकाले क्युबाका ११ अधिकारीमाथि पनि प्रतिबन्ध लगाएको छ, जसमा न्यायमन्त्री र क्रान्तिकारी सशस्त्र बलका उपमन्त्रीसमेत छन् ।
आइतबार अर्को झट्का लाग्यो, जब रोयटर्सले प्रमुख ढुवानी कम्पनी हापाग–लायड र सीएमए सीजीएमले ट्रम्प प्रशासनको नयाँ नियम पालना गर्न अब क्युबातर्फ वा क्युबाबाट ढुवानी नगर्ने जनाएको थियो । 
यसले क्युबामा खाद्य संकट अझ बढाउने सम्भावना छ । दशकौँदेखि कृषि क्षेत्रको पतन र आर्थिक कुप्रबन्धनका कारण क्युबा सरकारले अधिकांश खाद्य वस्तु आयात गर्दै आएको छ । एक समय प्रशस्त उत्पादन हुने चिनी, कफी र सुर्तीसमेत अहिले आयात गर्नुपर्ने अवस्था आएको छ ।
हालका महिनाहरूमा ट्रम्पले प्रेससँग कुरा गर्दै क्यास्ट्रो शासनको अन्त्य हुने भविष्यवाणी गर्दै आएका छन् । ‘मलाई लाग्छ, उनीहरू अन्ततः हामीकहाँ आउनुपर्नेछ,’ ट्रम्पले शुक्रबार प्रसारित फक्स न्युज अन्तर्वार्तामा भने । ‘यो असफल राष्ट्र हो । पूर्ण रूपमा असफल राष्ट्र ।’
दीर्घकालीन आर्थिक नाकाबन्दी र तेल आपूर्ति रोक्का गरेर ऊर्जा संकट चर्काइरहेको अमेरिकाले पूर्वराष्ट्रपति राउल क्यास्ट्रोविरुद्ध अभियोग दर्ता गर्ने तयारी गरिरहेको स्रोतहरूले बताएका छन् । यस्तो कदमले क्युबा सरकारप्रति अमेरिकी नीतिमा ठूलो कडाइ ल्याउनेछ ।
गएको शुक्रबार ट्रम्पले क्यास्ट्रोसम्बन्धी सम्भावित मुद्दाबारे टिप्पणी गर्न अस्वीकार गर्दै न्याय मन्त्रालयलाई बोल्न दिने बताए । उनले भने, ‘तर उनीहरू (क्युबालीहरू) लाई मद्दत चाहिएको छ ।’
क्युबाका विदेशमन्त्री ब्रुनो रोड्रिगेजले सोमबार एक्समा लेख्दै क्युबासँग ‘बाह्य आक्रमणविरुद्ध वैध आत्मरक्षाको अधिकार’ रहेको बताएका छन् ।
‘क्युबामाथि अवैध हमला गर्न चाहनेहरू कुनै पनि बहाना प्रयोग गर्छन्, चाहे त्यो जति भ्रामक वा हास्यास्पद किन नहोस्, ताकि अमेरिकी र विश्व जनमतविरुद्ध जाने आक्रमणलाई उचित ठहर गर्न सकून्,’ उनले लेखे ।
त्यसको अघिल्लो दिन रोड्रिगेजले ट्रम्प प्रशासनले ‘क्युबाली जनताविरुद्धको निर्दयी आर्थिक युद्ध र सम्भावित सैन्य आक्रमणलाई उचित देखाउन झुटा आधार निर्माण गरिरहेको’ आरोप लगाएका थिए ।
अमेरिकी केन्द्रीय गुप्तचर एजेन्सी (सीआईए) का निर्देशक जोन ¥याट्क्लिफ गत साता हवाना पुगेका थिए । उनले गृह मन्त्रालयका अधिकारी र क्युबाली गुप्तचर सेवाका प्रमुखहरुसँग दुर्लभ भेटवार्ता गरेका थिए ।
धेरै क्युबालीका लागि सम्भावित अमेरिकी सैन्य हमला नजिकिँदै गएको महसुस हुन थालेको छ र उनीहरू त्यसअनुसार तयारी गरिरहेका छन् ।
यस्तो सम्भावित अवस्थालाई ध्यानमा राख्दै क्युबाको नागरिक सुरक्षा निकायले पछिल्ला दिनहरूमा ‘क्युबामाथि सम्भावित सैन्य आक्रमण हुँदा कसरी व्यवहार गर्ने’ भन्ने पारिवारिक मार्गदर्शन पुस्तिका वितरण गरेको छ । यसमा दीर्घकालसम्म बिग्रँदैनन् यस्ता खाद्य सामग्रीसहितको झोला तयार राख्न सुझाव दिइएको छ । सर्वसाधारणलाई हवाई हमलाको साइरनप्रति सतर्क रहन आग्रह गरिएको छ । यसको शीर्षक छ, ‘सुरक्षित होऊ, प्रतिरोध गर, बाँच र विजयी बन ।’