टेबलटेनिसमा नेपालकी योंगी प्रथम

काठमाडौं । दक्षिण कोरियामा भएकोे याङ योङ जा टेबलटेनिस मिसन (वाईटीटीएम) अन्तर्राष्ट्रिय प्रशिक्षण शिविरअन्तर्गत आयोजित वाईटीटीएम टेबलटेनिस च्याम्पियनसिपमा नेपालकी योंगी पौडेलले पहिलो स्थान हासिल गरेकी छन् । 
जेठ २ देखि १२ गतेसम्म दक्षिण कोरियाको इन्चोनमा भएको उक्त च्याम्पियनसिपमा नेपालकी युवा खेलाडी योंगी पौडेलले यू–१९ विधातर्फ उत्कृष्ट खेल प्रदर्शन गर्दै प्रथम स्थान हासिल गरेको अखिल नेपाल टेबलटेनिस संघका कोषाध्यक्ष ज्याकी महर्जनले जानकारी दिए । 
    प्रथम स्थान हासिल गरेकी पौडेललाई सन् १९८८ की ओलम्पिक स्वर्ण पदक विजेता तथा दक्षिण कोरियाकी चर्चित टेबलटेनिस खेलाडी याङ योङ जाले पुरस्कार तथा सम्मान प्रदान गरेको अखिल नेपाल टेबलटेनिस संघका कोषाध्यक्ष महर्जनले जानकारी दिए । 
    योंगीले पुरस्कारस्वरूप रु १५ हजारका साथै टेबलटेनिस रबर तथा अन्य खेल सामग्री प्राप्त गरेकी छन् । त्यसैगरी, नेपाली टोलीका रिजन शाक्य, रिभानमुनि बज्राचार्य, प्राज्ना महर्जन र सुरम्या शाक्य सहभागी रहेको टोली इभेन्टमा प्रथम स्थान हासिल गर्न सफल भएका छन् । विजेता टोलीलाई रु ४० हजारसहित टेबलटेनिस रबर तथा अन्य खेल सामग्री प्रदान गरिएको थियो ।
    नेपालबाट यू–१३ तर्फ रिभानमुनि बज्राचार्य र प्राज्ञा महर्जन, यू–१६तर्फ रिजन शाक्य र सुरम्या शाक्य तथा यू–१९ तर्फ हिमाल बिष्ट र योंगी पौडेल सहभागी भएका थिए । 
    प्रशिक्षणका दौरान खेलाडीहरूले दक्षिण कोरियाको राष्ट्रिय प्रशिक्षण केन्द्रको अवलोकन गरेका थिए । अवलोकनका क्रममा उनीहरूले कोरियाका थुप्रै राष्ट्रियस्तरका खेलाडीहरूसँग भेटघाट तथा अनुभव आदानप्रदान गर्ने अवसर पाएका थिए । प्रतियोगितामा नेपाल, फिलिपिन्स, लाओस र मंगोलियालगायत विभिन्न देशका प्रशिक्षार्थी खेलाडीहरूको सहभागिता रहेको थियो ।