लेबनानको महŒवपूर्ण भूमिमा इजरायली कब्जा

जेरूसेलम, (बीबीसी) । इजरायली सेनाले दक्षिणी लेबनानमा बासिन्दाहरूलाई खाली गर्न चेतावनी दिएको क्षेत्र विस्तार गरेको छ, किनकि उसले हिजबुल्लाहविरुद्ध आफ्नो स्थल सैन्य अभियान अझ फैलाइरहेको छ ।
इजरायल डिफेन्स फोर्स (आईडीएफ) ले जाह्रानी नदीको दक्षिणतर्फ रहेका सबैलाई त्यहाँबाट निस्कन पुनः चेतावनी दिएको छ । एक प्रवक्ताले भने, ‘हिजबुल्लाहका तŒवहरू, सुविधा वा युद्ध सामग्री नजिक रहने जो कोहीले आफ्नो ज्यान जोखिममा पारिरहेका छन् ।’
यो चेतावनी सेनाले लिटानी नदीमाथिको अग्लो पहाडमा रहेको रणनीतिक महŒवको ब्यूफोर्ट किल्ला आफ्नो नियन्त्रणमा लिएको पुष्टि गरेको केही समयपछि आएको हो । हरेक दिनसँगै इजरायलको हिजबुल्लाहविरुद्धको युद्ध अझ विस्तार हुँदै गएको देखिन्छ ।
हालको निकासी चेतावनी पछिल्ला केही दिनमा दोस्रो पटक हो, जसमा इजरायलले जाह्रानी नदीभन्दा दक्षिणको सम्पूर्ण क्षेत्र खाली गर्न स्थानीय बासिन्दाहरूलाई निर्देशन दिएको छ ।
आईडीएफका प्रवक्ताले ‘महŒवपूर्ण संख्यामा इजरायली स्थल सैनिकहरू’ उक्त अभियानमा संलग्न रहेको र यो अभियान ‘अहिले थप क्षेत्रहरूमा विस्तार भइरहेको’ बताएका छन् ।
यसले इजरायली स्थल सेना आफ्नो प्रारम्भिक सीमारेखा मानिएको लिटानी नदीभन्दा अझ गहिरो लेबनानी भूभागमा प्रवेश गरिरहेको स्पष्ट संकेत दिएको छ ।
यसैबीच, आइतबार लेबनानको स्वास्थ्य मन्त्रालयले टायर शहरस्थित हिराम अस्पताल नजिक भएको हवाई आक्रमणमा १३ जना अस्पताल कर्मचारी घाइते भएको र अस्पतालमा ठूलो क्षति पुगेको जनाएको छ ।
लेबनानसँग ऐतिहासिक सम्बन्ध रहेको फ्रान्सले इजरायली सैन्य कारबाहीबारे छलफल गर्न संयुक्त राष्ट्र सुरक्षा परिषद्को बैठक बोलाउन अनुरोध गरेको छ ।
फ्रान्सका विदेशमन्त्री जाँ–नोएल बारोले टेलिभजनमा  कुरा गर्दै वर्तमान अवस्था ‘इजरायलका लागि ठूलो गल्ती’ भएको बताएका छन् ।
उनले भने, ‘लेबनानमा इजरायलका सैन्य कारबाहीको निरन्तरता र लेबनानी भूभागमा बढ्दो कब्जालाई कुनै पनि कुराले जायज ठहराउन सक्दैन ।’
‘डरको बाधा तोडेका छौँ’
लिटानी नदीभन्दा केही उत्तरतर्फ, आईडीएफले उक्त क्षेत्रको एक प्रमुख रणनीतिक उपलब्धि ब्यूफोर्ट किल्लालाई कब्जामा लिएको पुष्टि गरेको छ । करिब ९०० वर्षअघि क्रुसेडरहरूले लिटानी नदीमाथिका चट्टानी भीरहरूमा यो किल्ला निर्माण गरेका थिए र त्यसयता धेरै पटक युद्धको केन्द्र बनेको छ ।
इजरायली प्रधानमन्त्री बेन्यामिन नेतान्याहूले यस कब्जालाई ‘हाम्रो नीतिमा नाटकीय चरण र नाटकीय परिवर्तन’ भनेर वर्णन गरेका छन् ।
उनले भने, ‘हामीले डरको बाधा तोडेका छौँ । हामीले पहल लिएका छौँ र सिरिया, गाजा तथा लेबनानसहित सबै मोर्चामा सक्रिय छौँ ।’
रक्षामन्त्री इजरेल काट्जले ४४ वर्षअघि इजरायली सेनाले यही किल्लाका लागि लडेको युद्ध सम्झिए । उनका अनुसार त्यसबेला किल्ला कब्जा गर्ने गोलानी ब्रिगेड पुनः त्यहाँ पुगेको छ र किल्लामाथि इजरायली झण्डा फहराएको छ ।
त्यसैले इजरायलका लागि यो रणनीतिक मात्र नभई अत्यन्त प्रतीकात्मक विजय पनि हो । लेबनानीहरूको दृष्टिकोणबाट हेर्दा, पछिल्ला दिनहरूमा कब्जा गरिएका ऐतिहासिक स्थलहरूमध्ये यो अर्को महत्त्वपूर्ण स्थल हो । साथै, अझ उत्तरतर्फ रहेको नबातियेह शहर पनि आईडीएफको बढ्दो निशानामा परेको देखिन्छ ।
काट्जले किल्ला र त्यसको वरिपरिको पहाडी क्षेत्रको नियन्त्रणले सीमा पारि रहेका इजरायली समुदायहरूको सुरक्षा मजबुत बनाउने बताएका छन् ।