दैलेखमा जिप दुर्घटना, तीनको मृत्यु, पाँच जना घाइते

दैलेख । सुर्खेतबाट कालिकोटतिर जाँदै गरेको गाडी दुर्घटना हुँदा चालकसहित तीन जनाको मृत्यु भएको छ भने पाँच जना घाइते भएका छन् । प्रहरीका अनुसार दैलेखको भैरवी–५ कालगौडाको भीरमा सोमबार मध्यान्ह सु.प ०१००१ च ४९६४ नम्बरको यात्रुवाहक डबल क्याप डबल क्याब बोलेरो सडकबाट करिब ४ सय मिटर  तल खसेको हो ।
दुर्घटनामा मृत्यु हुनेमा ३५ वर्षीय चालक कुलबहादुर रोकाय, ३८ वर्षीय मित्र सुनार र ६० वर्षीया  पुतलीसरा बिक छन् । तीनैजना कालिकोट जिल्लाको शुभकालिका गाउँपालिकाका बासिन्दा हुन् । 
जिल्ला प्रहरी कार्यालय दैलेखका अनुसार घाइतेहरुको सुरक्षाकर्मी र स्थानीय बासिन्दाले उद्धार गरेका हुन् । उपचारार्थ जिल्ला अस्पताल दैलेखमा ल्याइएकामध्ये २६ वर्षीय सुमत बिक र ४० वर्षीय नैन सुनारलाई थप उपचारका लागि प्रदेश अस्पताल सुर्खेत रिफर गरिएको छ । दैलेखमा उपचार भइरहेकाहरुमा ३० वर्षीय चक्र सुनार, २० वर्षीय भरत विक. र २५ वर्षीय कमल सुनार छन् । सबै कालिकोटको शुभकालिकाका हुन् । ब्रेक फेल भएर दुर्घटना भएको हुनसक्ने प्रहरीको अनुमान छ ।