बजेट कार्यान्वयन हुन सके अर्थतन्त्रले नयाँ दिशा लिनेछः उद्योग परिसंघ

काठमाडौं । नेपाल उद्योग परिसंघ (सीएनआई) ले आर्थिक वर्ष २०८३-०८४ को बजेटलाई औद्योगिक प्रवर्धन, लगानी आकर्षण र आर्थिक सुधारतर्फ उन्मुख रहेको भन्दै स्वागत गरेको छ । परिसंघले बुधबार विज्ञप्ति जारी गरी आगामी आर्थिक वर्षको बजेट सफल कार्यान्वयन हुन सकेमा देशको अर्थतन्त्रले नयाँ दिशा लिने विश्वास व्यक्त गरेको हो । 
परिसंघले उत्पादनमूलक उद्योगका लागि तयारी वस्तु र कच्चा पदार्थबीचको भन्सार दरमा एक तहको अन्तर कायम गर्न २७३ वस्तुको भन्सार महसुल घटाउने निर्णयले स्वदेशी उत्पादनलाई प्रतिस्पर्धी बनाउन मद्दत पुग्न पनि जनाएको छ । त्यस्तै, ३६० वस्तुमा अन्तःशुल्क खारेज गरिनुले उत्पादन लागत घटाई औद्योगिकीकरणलाई थप गति दिने अपेक्षा गरिएको छ ।