‘सिक्ने तत्परता सधैं कायम राख्नुपर्छ’

काठमाडौं । कटनको सेतो सर्टमा जुटको टालो टाँसिएको छ । सियो धागोले सिलाएको उक्त टालो खैरो रङको छ । टालेको सर्ट लगाएर विश्वप्रसिद्ध फेसन डिजाइनर प्रवल गुरुङ आफ्नो पुस्तक ‘वाक लाइक अ गल्र्स’ को हस्ताक्षर कार्यक्रममा उपस्थित भए । 
पुस्तकको चर्चा जति थियो, उत्तिकै उनले लगाउने पहिरनले पाठकको ध्यान खिचेको थियो । खासगरी नेपाली समाजमा च्यातिएको र टालिएको लुगा लगाउनु गरिबीको संकेत दिन्छ । तर, फेसन डिजाइनर गुरुङले भने आफूले लगाएको उक्त टालेको सर्ट निकै महँगो अमेरिकी डलरमा किनेको बताए, ‘टालेको सर्ट अमेरिकामा डलर हालेर किनेर लगाए, यो स्टाइल हो ।’
शनिबार जमलस्थित मण्डला बुक प्वाइन्टमा पुस्तक हस्ताक्षर कार्यक्रममा देखिनुभएका गुरुङले भने, ‘लुगा कस्तो लगाउनेभन्दा पनि कसले र कति आत्मविश्वासका साथ लगाएको छ भन्ने कुराले निकै महŒव राख्छ ।’ उनले आत्मविश्वासका साथ टालेको लुगा लगाउदा पनि राम्रो र प्रभावकारी व्यक्तित्व झल्किन सक्ने सन्देश दिन उक्त पहिरन लगाएको बताए । 
अमेरिकामा बस्दै आएका गुरुङ प्रत्येक एक वर्षमा दुई पटक नेपाल आउँछन् । नेपालमै बसोबास गर्ने परिवारलाई भेट्न उनले जतिसुकै व्यस्त भए पनि समय मिलाउने गरेको बताए । ‘जहाँ जाउ यो मन त मेरो नेपाली नै हो नि,’ गुरुङले भने, ‘नेपाली खाना, मुमा (आमा) को माया र यहाँको संस्कृतिले मन छुन्छ । वर्षमा दुई पटक आमाको हातले पकाएको गुन्द्रुकको अचार, दाल भात खान आएकै हुन्छु ।’
नेपाली मूलका गुरुङको जन्म सिंगापुरमा भएको हो भने उनी भारतमा हुर्किए । दिल्लीको नेशनल फेसन इन्स्टिच्युटमा अध्ययन गरेर उनले फेसन डिजाइनरको करिअर न्यूयोर्कबाट सुरु गरे । गुरुङले सन् १९९९ मा न्युयोर्कबाट फेसन डिजाइनसम्बन्धी शिक्षा लिए । साथै, अन्तर्राष्ट्रिय ब्रान्डका फेसन यात्रामा सक्रिय भई सफलताको उचाइमा पुगेका हुन् । 
उनले हलिउडदेखि बलिउड फिल्मी क्षेत्रका प्रख्यात व्यक्तित्वहरुका लागि फेसन डिजाइन गरेका छन् । तत्कालीन अमेरिकी प्रथम महिला मिसेल ओमाबादेखि बेलायती राजकुमारीको रोजाइको पहिरन फेसन डिजाइन गरेका उनको नाम अन्तर्राष्ट्रिय फेसन जगतमा चिरपरिचित छ । 
फेसन डिजाइन यात्रामा झण्डै तीन दशकदेखि सक्रिय उनी अझै आफूलाई यस क्षेत्रमा भर्खरै सुरुआत गर्दै गरेको मान्छन् । उनका अनुसार फेसन क्षेत्रमा सिक्ने तत्परता सधैं कायम राख्नुपर्छ । सिक्ने निरन्तरतालाई नै उनले आफ्नो सफलताको सूत्र मानेका छन् । ‘फेसन जगत सागर हो, जति सिक्दै गयो उति गहिराइमा पुगिन्छ,’ उनी भन्छन्, ‘धेरै काम गर्न बाँकी छ ।’
हारपर कोलिन्सले यसै वर्ष प्रकाशन गरेको गुरुङको पुस्तक ‘वाक लाइक अ गल्र्स’ को कथा रोचक छ । केटीको हिँडाइको चालमा केन्द्रित भएर शीर्षक राख्नुमा आफ्नै बाल्यकालको भोगाइ समेटिएको उनले सुनाए । सानो छँदा केटी जस्तै हिँड्ने भन्दै साथीभाइले गिज्याउने गरेको क्षणलाई किताबको मुख्य शीर्षक बनाएको उनले खुलाए । 
सिर्जना गर्ने क्षमता राख्ने महिलाप्रति समाजको हेपाह दृष्टिलाई चिर्न पनि पुस्तकको शीर्षक यस्तो राख्नुपरेको गुरुङले बताए । ‘केटी जस्तो हिँड्दा के फरक पर्छ ? म त भन्छु हिँडाइ केटीको जस्तै हुनुपर्छ,’ उनले भने, ‘जहाँ, शान्ति, सभ्यता र गम्भीरता झल्किन्छ ।’ पुस्तकमार्फत नारी अस्तित्वलाई स्वीकारोक्तिको भावले हेर्न आग्रह गरेको पनि उनले प्रष्ट पारे । 
आफ्नो पुस्तकले युवापुस्तालाई लक्ष्य प्राप्तिका लागि संघर्ष गर्न प्रेरणा मिल्नसक्ने गुरुङले विश्वास व्यक्त गरे । उनले भने, ‘मैले चर्चा पाउन काम सुरु गरिन्, मेहनतको निरन्तरताले गर्दा सफलता आफैं आउँदै गयो । पुस्तकले यही सन्देश दिन खोजेको छ, मेहनत गर । सफलता आफैं आउँछ ।’ मण्डला बुक प्वाइन्टका प्रमुख सिद्धार्थ महर्जनले गुरुङको हस्ताक्षरित १०० भन्दा बढी पुस्तक बिक्री भएको बताए । पाठकहरु पुस्तक किन्नुका साथै गुरुङसँग भलाकुसारी गर्ने अवसर पाउँदा हर्षित थिए । रासस