रविमाथिको अभियोग रुपन्देहीमा पनि फिर्ता

काठमाडौं । सत्तारूढ दल रास्वपाका सभापति रवि लामिछानेविरुद्धको रहेका मुद्दामा संगठित अपराध र सम्पत्ति शुद्धीकरणको अभियोग रुपन्देही जिल्ला अदालतले पनि फिर्ता लिएको छ । न्यायाधीश रमेशकान्त अधिकारीको इजलासले सोमबार सहकारी ठगीको मुद्दा यथावत् राखी त्यसपछि थपिएका दुई अभियोगहरू फिर्ता लिने आदेश गरेको हो । 
रुपन्देही जिल्ला अदालतको आदेशसँगै लामिछाने, जीवी राईलगायतका आरोपितहरूले पीडितहरूको फसेको रकम फिर्ताको सुनिश्चितता गरी मुद्दामा मिलापत्र गर्ने बाटो खुलेको छ । लामिछानेसँगै यो मुद्दामा मुछिएका जीवी राई, कुमार रम्तेललगायत पनि सहकारी ठगीबाहेकका अरू अभियोगबाट मुक्त भएका छन् । 
यसअघि जिल्ला अदालत कास्की र पर्साले सहकारी ठगीबाहेकका अभियोग फिर्ता लिएका थिए । उनीविरुद्ध देशभरका ५ वटा अदालतमा मुद्दा अघि बढेको थियो । त्यसमध्ये चार वटामा सहकारी ठगीसँगै संगठित अपराध र सम्पत्ति शुद्धीकरणका मुद्दा पनि थिए । अब यी दुई मुद्दा काठमाडौंमा मात्रै बाँकी छ । सहकारी ठगीको मुद्दा भने अदालतमा विचाराधीन नै छ । संगठित अपराध र सम्पत्ति शुद्धीकरण कसुर अभियोग फिर्ता लिने निर्णय महान्यायाधिवक्ता कार्यालयले गरेको थियो ।