मन्त्रीहरूलाई बोलीकै गलपासो

काठमाडौं । संघीय सरकारका प्रधानमन्त्रीदेखि मन्त्रीहरू एकपछि अर्को गर्दै आफ्नै बोलीका कारण विवादमा तानिएका छन् । भौतिक पूर्वाधार विकास मन्त्री सुनिल लम्सालले आइतबार दिएको अशोभनीय अभिव्यक्तिका कारण संसद्देखि सामाजिक सञ्जालसम्म आलोचनाको तारो बनेका छन् । 
मन्त्री लम्सालले सडक अनुगमनका क्रममा जिम्मेवार निकायहरूलाई दिएको एउटा निर्देशनले उनी आलोचित भएका हुन् । नागढुंगा–मुग्लिन सडक आयोजनाको अनुगमनका क्रममा उनले ‘ठेकेदारले काम नगरे खुट्टा भाँच्दिनु’ भन्दै कानूनविपरीतको आदेश दिएका थिए । पूर्वदेखि पश्चिमसम्म निर्माणाधीन सडकहरूको अवलोकनमा रहेका लम्सालले धादिङ खण्डमा पुग्दा बिजुलीका पोल नसारेका कारण काम रोकिएको खबर पाए । सो क्रममा अनुगमनमा आएका धादिङका प्रमुख जिल्ला अधिकारी, जिल्ला प्रहरी प्रमुख र आयोजनाका प्रमुखहरू लगायतसामु कड्किँदै उनले भने, ‘त्यो पोलवाला कन्ट्र्याक्टरलाई यो धरतीमा जहाँ भए पनि खोजेर ल्याउनु...त्यसले काम गरेन भने खुट्टा भाँच्दिनू, मतलब भएन ।’ उक्त भिडियो अहिले सामाजिक सञ्जालभरि छताछुल्ल छ । उनको यो शैलीलाई कतिपय जिम्मेवार नभएको भन्दै आलोचना गरेका छन् । 
निर्माण व्यवसायीमाथि आक्रोश पोख्ने लम्साल पहिलो मन्त्री भने होइनन् । हालका प्रधानमन्त्री वालेन्द्र शाहले गत फागुनमा निर्माण व्यवसायीविरुद्ध यस्तै अभिव्यक्ति दिएका थिए । ‘दुई वर्षमा बन्ने बाटो २० वर्षमा पनि बन्दैन, डेढ वर्षमा बन्नुपर्ने हाम्रो एजेन्डा हो,’ शाहले निर्वाचनको जिल्ला दौडाहाका क्रममा धनगढी पुगेर भनेका थिए, ‘रुखमा बाँधेर हुन्छ कि, बाटोमा सुताएर हुन्छ कि, खोरमा जाकेर हुन्छ कि बाटो बन्नुपर्छ ।’ बालेनको अभिव्यक्ति त्यतिबेला विवादमा परेको थियो । अहिले बालेनले देश बनाउने टिम भनेर आफ्नो तस्बिर सामाजिक सञ्जालमा राखेकै दिन लम्सालले फागुनकै बालेन शैली पछ्याएका छन् । 
प्रमुख विपक्षी दल कांग्रेसका उपसभापति विश्वप्रकाश शर्माले प्रधानमन्त्री शाहलाई आफ्ना मन्त्रीहरूको बोलीमा लगाम लगाउन सुझाव दिएका छन् । शर्माले भिडिओ सन्देश जारी गर्दै भनेका छन्, ‘एकजना मन्त्रीजी सडकमा पुग्नुभएर भन्नुभएछ यो बाटो निर्माणमा ढिलो जो भइरहेको छ, निर्माण व्यवसायीलाई भेट्नुभयो भने खुट्टा भाँच्दिनुस् । सुदूरपश्चिमबाट केही दिनअगाडिको मात्रै खबर आएको थियो धनगढीबाट कर्मचारीहरू मिलेर एक श्रमिक महिलाको टेम्पोलाई भीरबाट धकेलिदिए ।’ शर्माले मधेस प्रदेशको सिरहाको परीक्षा हलमा भेटिएका ५ सयभन्दा बढी मोबाइललाई पानीमा चोपेर नष्ट गरिएको सन्दर्भ पनि सम्झिएका छन् भिडियोमा । 
‘समाज कता जाँदै छ? तर यहाँले पनि चुनावकै बेलामा भन्नुभएको थियो, यदि बाटो निर्माण गर्न ढिलो भयो भने रुखमा बाँधेर समाधान गर्नुपर्छ । म सम्झिन्छु एउटा देशको घटना जहाँ कसैले चोरी ग¥यो, चोरलाई सजाय दिनलाई दुइटै हात काटियो । के हामी यस्तै समाजतर्फ जाँदै छौं ?,’ शर्माले प्रश्न गरेका छन् ।
त्यस्तै, लम्सालको अभिव्यक्तिको विषय नेकपा संसदीय दलका प्रमुख सचेतक युवराज दुलालले संसद्मै उठाए । प्रधानमन्त्रीको देश बनाउने टिमका सदस्यबाट ठेकेदारको खुट्टा भाँच्ने धम्की आउनु निन्दनीय भएको उनको भनाइ छ । शाहले सामाजिक सञ्जालमा आइतबार लम्साल र गृहमन्त्री गुरुङसहित आफ्नो तस्बिर राखेर देश बनाउने टिम लेखेका तर्फ दुलालले कटाक्ष गरे । 
दुलालले, प्रधानमन्त्रीले सार्वजनिक गरेको देश बनाउने टिमका सदस्यबाट त्यस्तो अभिव्यक्ति आउँदा नवयुवामा राम्रो सन्देश नजानेतर्फ सचेत गराए । ‘हिजो प्रधानमन्त्रीले देश बनाउने ३ सदस्यीय जम्बो टोलीको फोटो सार्वजनिक गर्नुभएको थियो । त्यसलगत्तै एक सदस्य योद्धा मन्त्रीजीले निर्माण व्यवसायीको खुट्टा भाँच्न सार्वजनिक रूपमा निर्देशन दिनुभएछ । विधिको शासन की धम्कीको शासन मन्त्री जी, तपाईंको उक्त अभिव्यक्ति निन्दनीय छ । तपाईं देशको मन्त्री, युवाको आदर्श ! तपाईंबाट नवयुवाले के सिक्ने ?’ उनले प्रश्न गरे । सुकुम्वासी बस्तीमा अमानवीय आक्रमण, कैलालीमा टेम्पो भीरबाट गुल्टाउने र घरका छानामाथि ढुंगा हान्ने बहादुर सरकारले निर्माण व्यवसायीलाई खुट्टा भाँच्ने निर्देशन दिनु ठुलो कुरा नभएको दुलालले बताए । 
उसो त बोलीकै कारण विवादमा तानिने लम्साल पहिलो मन्त्री होइनन् । गत जेठ १७ मा संसद्को रोष्ट्रमबाट ‘नेपालले पनि भारतको जमिन मिचेको रहेछ’ भन्ने अभिव्यक्तिपछि प्रधानमन्त्री शाह विवादमा तानिएका थिए । सोही विषयलाई लिएर संसद्समेत अवरुद्ध भयो भने अझै प्रतिपक्षी दलले प्रधानमन्त्रीको जवाफ माग गरिरहेका छन् । 
त्यस्तै, अर्थमन्त्री वाग्ले पनि आव २०८३÷८४ को बजेटमाथिको छलफलका क्रममा विपक्षीलाई धम्की दिएको भन्दै आलोचित छन् । आफूलाई प्रश्न गरेकोमा असन्तुष्ट देखिएका उनले प्रतिपक्षीहरूतर्फ संकेत गर्दै ‘तपाईंहरूका काण्डबारे हामी अनभिज्ञ हो र ? ती पनि खुल्नेछन्’ भनेका थिए । बजेटमा करको दर हेरफेर गरेको भन्दै विपक्षी दलले उनको राजीनामादेखि संसदीय समिति गठनसम्मको माग गरिरहेका छन् । तर, वाग्लेले भने आफ्नो बचाउ गर्दै बद्मासी नगरेको प्रष्टीकरण दिइरहेका छन् । वाग्लेले विपक्षी सांसदहरूलाई रोष्ट्रमबाट धम्की दिनु गलत भन्दै विपक्षी दलहरूले उनका छानबिनको चुनौती सामना गर्ने चुनौती दिँदै आलोचना गरिररहेका छन् ।