‘नागरिकको अपेक्षाः जिम्मेवार पत्रकारिता’ विषयमा अन्तरक्रिया

पनौती । सम्पादक समाज नेपालको आयोजना तथा सूचना तथा सञ्चार मन्त्रालयको सहकार्यमा ‘नागरिकको अपेक्षा ः जिम्मेवार पत्रकारिता’ विषयक एकदिवसीय अन्तरक्रिया शनिबार काभ्रेको पनौतीमा सम्पन्न भएको छ ।
कार्यक्रममा पनौती नगरपालिकाका नगर प्रमुख रामशरण भण्डारीले सञ्चार माध्यमप्रति नागरिकको विश्वास घट्दै गएको भन्दै पत्रकारिता क्षेत्र थप जिम्मेवार र संवेदनशील बन्नुपर्ने बताए । उनले कृत्रिम बुद्धिमत्ता (एआई) र च्याटजिपिटीजस्ता प्रविधिले पत्रकारको सिर्जनशीलता र क्षमतामा नयाँ चुनौती थपेको उल्लेख गरे ।
नेपाल पत्रकार महासंघका पूर्वकेन्द्रीय अध्यक्ष डा. महेन्द्र विष्टले मिडियाको संख्या बढे पनि विषयवस्तुमा विविधता र गुणस्तर कायम हुन नसकेको बताए । उनले पत्रकारहरूले आचारसंहिता पालना गर्दै लोकतन्त्रमा मिडियाको भूमिकाबारे आत्मसमीक्षा गर्नुपर्ने धारणा राखे ।
प्रशिक्षक डा. जगत नेपालले सूचना र समाचारबीचको भिन्नता बुझ्दै स्रोत पुष्टि गरेर मात्र समाचार सम्प्रेषण गर्नुपर्ने बताए । अध्ययनकर्ता तोया गौतमले काभ्रेको छापा पत्रकारिताको अवस्थाबारे जानकारी दिँदै स्थानीय विषयवस्तुलाई प्राथमिकता दिए नागरिकको विश्वास बढ्ने बताए ।
कार्यक्रममा पत्रकारिता क्षेत्रमा प्रविधि, सामाजिक सञ्जालको प्रभाव, मोफसल पत्रकारिताका चुनौती र जिम्मेवार पत्रकारिताका विषयमा विभिन्न वक्ताहरूले धारणा राखेका थिए । कार्यक्रमको अध्यक्षता सम्पादक समाज नेपालका अध्यक्ष पुरु रिसालले गरेका थिए भने सञ्चालन कोषाध्यक्ष माधव दुलालले गरेका थिए ।