मैदानबाहिर ब्रान्डको महासंग्राम

विश्वकप फुटबल खेलको नतिजा मात्र होइन, यसको व्यापारिक पाटो पनि उत्तिकै रोचक हुन्छ । खेलको मैदानमा खेलाडीहरू जितका लागि भिडिरहँदा, मैदान बाहिर विश्वका दुई ठूला खेलकुद सामग्री उत्पादक कम्पनी नाइकी र एडिडास उपभोक्ताको मन र खल्ती जित्ने होडबाजीमा छन् । यो महासंग्राममा अर्बौँ डलर र ब्रान्डको प्रतिष्ठा दाउमा लागेको छ ।
यस पटक दुवै कम्पनीले हलिउड फिल्मलाई माथ दिने शैलीका विज्ञापन निर्माण गरेका छन् । नाइकीको ‘रिप द स्क्रिप्ट’ नामक विज्ञापनमा किलियन एम्बाप्पे, क्रिस्टियानो रोनाल्डो र लेब्रोन जेम्स जस्ता स्टारहरू फिचर छन्, जसले युट्युबमा ७ करोड ६० लाखभन्दा बढी भ्युज पाइसकेको छ । अर्कोतर्फ, एडिडासले लामिन यमाल, जुड बेलिङ्घम, लियोनेल मेस्सी र एआई प्रविधिबाट निर्मित डेभिड बेक्ह्यामलाई समेटेर ’ब्याकयार्ड लेजेन्ड्स’ सार्वजनिक गरेको छ । रिपोर्टका अनुसार एडिडासले यो विज्ञापनका लागि मात्रै ५ करोड पाउन्ड खर्चिएको छ ।
नाइकीले डिजिटल दुनियाँ र युट्युब भ्युजमा बाजी मारिरहँदा, अमेरिकाको न्युयोर्क सहरमा भने एडिडास हाबी देखिएको छ । न्युयोर्कको सोहो क्षेत्रमा रहेका दुवैका फ्ल्यागसिप स्टोरहरू मध्ये एडिडासले आफ्नो स्टोरलाई पूर्ण रूपमा विश्वकपमय बनाएको छ । सहरका अन्य भागमा पनि एडिडासका पप–अप स्टोर र विज्ञापनहरू बढी आक्रामक रूपमा प्रस्तुत गरिएका छन् ।
यसको मुख्य कारण एडिडासले फुटबललाई फेसन र युवा संस्कृतिसँग जोड्न सफल हुनु हो । विशेष गरी जापान र कुरासाओ जस्ता देशका वैकल्पिक जर्सीहरू युवाहरूमाझ दैनिक फेसन र पहिचानको माध्यम बनेका छन्, जसले मैदान बाहिर पनि एडिडासको लोकप्रियता बढाएको छ ।
खेलकुद ब्रान्ड रणनीतिकार जेम्स क्रिकहमका अनुसार अचेल फुटबल केवल खेलमा सीमित छैन; यो फेसन, सङ्गीत, गेमिङ र पप संस्कृतिसँग जेलिएको छ । सामाजिक सञ्जालको ‘क्लिप कल्चर’ (छोटा भिडियोहरू) का कारण विज्ञापन हेर्ने तरिका बदलिए पनि यसको प्रभाव उत्तिकै बलियो छ । जर्सी प्रायोजनको दौडमा यस पटक १४ टोलीसँग एडिडास अगाडि छ भने नाइकीले १२ टोलीलाई साथ दिएको छ । बुट सम्झौता र खेलाडीको पारिश्रमिकमा पनि करोडौँ डलरको खोलो बगाइएको छ, जस्तै नाइकीसँग रोनाल्डोको वार्षिक झन्डै १ करोड ८० लाख डलरको सम्झौता छ ।
विश्वकप पृथ्वीकै सबैभन्दा ठूलो खेल उत्सव भएकाले दुवै ब्रान्डका लागि यो प्रतिष्ठाको विषय बनेको छ । तर, डिजिटल भ्युजमा नाइकी र सहरको चहलपहलमा एडिडास अगाडि देखिए पनि वास्तविक विजेता को बन्यो र कसले बढी सामान बेच्यो भन्ने कुराको यकिन नतिजा भने विश्वकपको ट्रफी उचालिएपछि आउने वित्तीय विवरणले मात्रै स्पष्ट पार्नेछ । अन्ततः, व्यापारमा सधैँ अङ्ककै खेल निर्णायक हुन्छ ।