स्वर्गद्वारीका उपमेयरको दुर्घटनामा निधन

बुटवल । आफैंले चलाएको गाडी दुर्घटनामा प्यूठानको स्वर्गद्वारी नगरपालिकाका उपप्रमुख मीनराज राना मगरको शनिबार मृत्यु भएको छ । लु.प्र.०१–००१ झ ०००८ नम्बरको बोलेरो पिकअप स्वर्गद्वारी–२ बांगेसाल सडक खण्डमा स्वर्गद्वारीबाट धनवाङतर्फ जाँदै गर्दा दुर्घटना भएको प्यूठानका डीएसपी नरहरि अधिकारीले बताए । 
खाल भन्ने स्थानमा सडकदेखि झण्डै ४०० मिटर तल खसेको बोलेरोलाई क्रेनले तानेर उचालेपछि उपप्रमुख रानालाई उद्धार गरी उपचारार्थ भिंग्री अस्पतालमा लगिएको थियो । त्यहाँ  स्वास्थ्यकर्मीले उनलाई मृत घोषणा गरेको प्रहरीले जनाएको छ । 
उपप्रमुख राना नगरपालिकाको योजना अनुगमनका निस्केका थिए । उनी एक ठाउँको योजना निरीक्षणपछि एक्लै अर्को योजनाबारे बुझ्ने भन्दै हिँडेका बेला घटना भएको हो । जनमोर्चा नेता राना २०७९ को स्थानीय तह निर्वाचनमा ७ हजार ३७७ मत ल्याइ निकटतम प्रत्यासी एमाले उम्मेदवारलाई २ हजार ३५१ मतले पछि पार्दै विजयी भएका थिए ।