ट्रम्पका सहयोगी किर्कको हत्या, विश्वका नेताहरू स्तब्ध

एजेन्सी – अमेरिकी राष्ट्रपति डोनाल्ड ट्रम्पका निकट सहयोगी तथा दक्षिणपन्थी कार्यकर्ता चार्ली किर्कको युटा राज्यमा गोली हानी हत्या गरिएको छ । युटाह भ्याली विश्वविद्यालयमा आयोजना गरिएको कार्यक्रममा सहभागी भइरहेका बेला अज्ञात व्यक्तिले छततर्फबाट गोली चलाएको अधिकारीहरूको अनुमान छ । प्रत्यक्षदर्शीका अनुसार, सामूहिक गोलीबारीबारे प्रश्न सोधिरहेका क्रममा किर्कलाई लक्षित गरी प्रहार गरिएको थियो ।

राष्ट्रपति ट्रम्पले किर्कको निधनलाई अमेरिकाका लागि ‘कालो क्षण’ भन्दै गहिरो शोक व्यक्त गरेका छन् । सामाजिक सञ्जालमार्फत जारी भिडियो सन्देशमा उनले किर्कलाई ‘सत्यका लागि शहीद’ को संज्ञा दिँदै घटनामा संलग्न सबैलाई कडा कारबाही गर्ने चेतावनी दिएका छन् । किर्कले १८ वर्षकै उमेरमा ‘टर्निङ प्वाइन्ट यूएसए’ नामक संगठन स्थापना गरेका थिए र ३१ वर्षमै अमेरिकी रूढीवादी राजनीतिमा प्रभावशाली स्वर बनेका थिए ।

किर्कको हत्यापछि विश्व नेताहरूले तीव्र प्रतिक्रिया दिदैँ ‘लोकतन्त्रका लागि खतरा’ बताएका छन् । अमेरिकी दक्षिणपन्थी कार्यकर्ता तथा राष्ट्रपति डोनाल्ड ट्रम्पका निकट सहयोगी चार्ली किर्कको स्पष्ट राजनीतिक हत्यापछि विश्व नेताहरूले राजनीतिक रूपमा प्रेरित हिंसाको खतराबारे चेतावनी दिएका छन् ।

केवल ३१ वर्षको उमेरमा रूढीवादी राजनीतिमा उदाउँदो शक्तिशाली स्वर बनेका किर्कलाई युटाको युटाह भ्याली विश्वविद्यालयमा एक कार्यक्रममा बोल्दै गर्दा गोली प्रहार गरिएको थियो । उनको हत्यापछि विश्व नेताहरूले यसरी प्रतिक्रिया जनाएका छन् । 

अमेरिकाका लागि कालो क्षण : ट्रम्प

‘यो अमेरिकाका लागि कालो क्षण हो’, राष्ट्रपति डोनाल्ड ट्रम्पले हत्या भएको केही घण्टापछि ट्रुथ सोसलमार्फत जारी भिडियो सन्देशमा भने । उनले किर्कलाई ‘सत्यका लागि शहीद’ को उपाधि दिँदै भने, ‘मेरो प्रशासनले यस अत्याचारमा संलग्न हुने हरेकलाई पत्ता लगाउनेछ, जसमा यसलाई कोष वा समर्थन गर्ने संस्थाहरू पनि पर्नेछन् ।’

कुनै औचित्य छैन : क्यानाडा

क्यानाडाका प्रधानमन्त्री मार्क कार्नीले एक्समा लेखेको छन्, ‘चार्ली किर्कको हत्याबाट म स्तब्ध छु । राजनीतिक हिंसाको कुनै औचित्य छैन । यसको हरेक कार्यले लोकतन्त्रलाई गम्भीर खतरा पु¥याउँछ ।’

बहस गर्न स्वतन्त्र हुनुपर्छ : बेलायत

बेलायती प्रधानमन्त्री किर स्टार्मरले एक्समा भने, ‘हामी सबै डरबिना स्वतन्त्र रूपमा बहस गर्न सक्षम हुनुपर्छ । राजनीतिक हिंसाको कुनै औचित्य हुन सक्दैन ।’

लोकतन्त्रका लागि गहिरो घाउ : इटाली

इटालीकी प्रधानमन्त्री जोर्जिया मेलोनीले एक्समा लेखेका छन्, ‘यो नृशंस हत्या लोकतन्त्र र स्वतन्त्रतामा विश्वास गर्नेहरूका लागि गहिरो घाउ हो । उनका परिवार, प्रियजन र अमेरिकी रूढीवादी समुदायप्रति मेरो गहिरो समवेदना छ ।’

सत्य बोलेका कारण हत्या भयो : इजरायल

इजरायली प्रधानमन्त्री बेन्जामिन नेतान्याहुले भने, ‘चार्ली किर्कको हत्या सत्य बोलेको र स्वतन्त्रताको रक्षा गरेको कारणले भएको हो । उनले इजरायलका सच्चा मित्र थिए, जसले झूटविरुद्ध लड्नुभयो र यहुदी–ईसाई सभ्यताका लागि उभिए ।’ नेतान्याहुले थपे, ‘मैले दुई हप्ताअघि मात्रै उनीसँग कुरा गरेको थिएँ र उनलाई इजरायल भ्रमणको निम्तो दिएको थिएँ । दुर्भाग्यवश, त्यो भ्रमण अब सम्भव हुने छैन ।’ अमेरिकी अधिकारीहरूले घटनाको अनुसन्धान भइरहेको जनाएका छन् ।