प्रतिनिधि सभा विघटन, सुशीला कार्कीलाई प्रधानमन्त्री बनाउने सहमति

काठमाडौं, २७ भदौ । पूर्वप्रधानन्यायाधीश सुशीला कार्की आज राति ९ बजे प्रधानमन्त्रीको शपथ लिने तयारीमा छिन् । दिनभरको राजनीतिक रस्साकस्सीपछि शुक्रबार साँझ प्रमुख दलहरूबीच प्रतिनिधिसभा विघटन र कार्कीलाई सरकारको नेतृत्व दिने सहमति जुटेको हो ।

शीतलनिवास स्रोतका अनुसार, आन्दोलनरत युवाहरूले तत्काल घेराबन्दी गर्ने चेतावनी दिएपछि राष्ट्रपति रामचन्द्र पौडेलले अडान फेरेर सहमति स्वीकार गरेका हुन् । उनले प्रमुख दलका नेताहरुलाई प्रतिनिधिसभा विघटन गर्ने निर्णय गर्न लागेको र त्यसलगत्तै कार्कीलाई प्रधानमन्त्रीमा शपथ गराउने तयारी भइरहेको बताएका छन् ।

हाल शीतलनिवासमा प्रतिनिधिसभा विघटनसम्बन्धी निर्णय र कार्कीलाई प्रधानमन्त्री नियुक्त गर्ने पत्रको मस्यौदा तयारी अन्तिम चरणमा पुगेको बताइएको छ ।