एम्बाप्पेको १९औं गोल, मेसीको कीर्तिमान पछ्याउँदै

फ्रान्सका किलियन एम्बाप्पेले शनिबार पाराग्वेविरुद्ध अन्तिम–१६ चरणको खेलमा पेनाल्टीमार्फत आफ्नो करिअरको १९औं विश्वकप गोल गरे र कीर्तिमानधारी अर्जेन्टिनाका लियोनेल मेसीभन्दा केवल एक गोलले मात्र पछि परे ।
एम्बाप्पेले आफ्नो दौडमा हल्का रोकिँदै प्रहार गर्दै विश्वकपका १९ खेलमा १९औं गोल गरे । उनले ७०औं मिनेटमा पाराग्वेका गोलरक्षक ओरलान्डो गिललाई पराजित गर्दै गोलरहित बराबरी तोडे । भिडियो समीक्षा पछि डिएगो गोमेजले फाउल गरेको ठहर भएपछि फ्रान्सका कप्तानलाई पेनाल्टी दिइएको थियो ।
‘पहिलो दिनदेखि नै मैले भनेको थिएँ, उनीसँग त्यो भावना थियो । उनले शारीरिक रूपमा सबै प्रयास गरे,’ फ्रान्सका प्रशिक्षक डीडीए डेसाम्प्सले ब्लुजले १–० ले जितेपछि भने, ‘उनी मैदानमा उत्कृष्ट खेलाडी हुन् । तर जब उनी बोल्छन्, उनी सम्पूर्ण समूहका लागि बोल्छन् ।’
यो प्रतियोगितामा एम्बाप्पेको सातौं गोल थियो, जसले उनलाई विश्वकपको सर्वाधिक गोलकर्तालाई दिइने गोल्डेन बुटको दौडमा मेसीसँग बराबरीमा पु¥यायो । चार वर्षअघि कतारमा एम्बाप्पेले यो पुरस्कार जितेका थिए, तर फाइनलमा मेसी र अर्जेन्टिनाले फ्रान्सलाई हराएका थिए ।
अब एम्बाप्पे लगातार तीन विश्वकपको नकआउट चरणमा कम्तीमा तीन गोल गर्ने एकमात्र खेलाडी बनेका छन् । शनिबार उनले यस प्रतियोगितामा अहिलेसम्मकै सबैभन्दा शारीरिक खेल प्रस्तुत गर्ने प्रतिद्वन्द्वीको सामना गरे ।
पहिलो हाफमा तनाव बढ्यो, जब आन्द्रेस कुबासले एम्बाप्पेलाई लडाए र केही समय दुवै टोलीका खेलाडीबीच धकेलाधकेल भयो । मातियास गलार्साले पनि आफ्नो दाहिने कुहिनो एम्बाप्पेतर्फ प्रहार गर्दा उनी मैदानमा लडे ।
खेलपछि एम्बाप्पेले गिलसँग हात मिलाउन अस्वीकार गरेपछि गोलरक्षकले फ्रान्सेली स्टारको ढाडमा बल प्रहार गरेका थिए ।
‘हामीलाई थाहा थियो, यो कस्तो खेल हुनेछ । हामी पनि आवश्यक परे हात फोहोर बनाउन सक्छौं, त्यो गर्न जान्दछौं,’ एम्बाप्पेले फ्रेन्च भाषामा भने, ‘हामी कुरूप फुटबल पनि खेल्न जान्दछौं । उनीहरूले सायद हामी टक्सिडो लगाएर आउँछौं भन्ने सोचेका थिए, तर हामी तयार थियौं । त्यस्तो खेलमा पनि हामी उनीहरूभन्दा राम्रो भयौं । त्यो उनीहरूको खेल्ने शैली हो । खेल्ने सही वा गलत तरिका भन्ने हुँदैन । उनीहरूले त्यसरी हामीलाई हराउने प्रयास गरे तर जित हाम्रो भयो ।’
यस जितसँगै एम्बाप्पेलाई मेसीको विश्वकप गोलको कीर्तिमान पछ्याउने अवसर पनि खुल्यो । मेसीले शुक्रबार राति केप भर्डेमाथि अर्जेन्टिनाको ३–२ को जितमा आफ्नो करिअरको २०औं विश्वकप गोल गरेका थिए । ३९ वर्षीय महान् खेलाडीले लगातार आठ विश्वकप खेलमा गोल गर्ने कीर्तिमान पनि बनाएका छन् ।
गोल्डेन बुटको दौडमा नर्वेका एर्लिङ हालान्ड र इंग्ल्यान्डका ह्यारी केन पाँच–पाँच गोलसहित त्यसपछि छन् । प्रतियोगिता समाप्त हुँदा गोल्डेन बुटमा बराबरी भएमा फिफाले पहिलो टाइब्रेकरका रूपमा असिस्ट र दोस्रो टाइब्रेकरका रूपमा कम समय खेलेको आधार प्रयोग गर्नेछ । असिस्टमा एम्बाप्पे २–० ले मेसीभन्दा अगाडि छन् ।