निर्वाचन सफल पार्न सहयोग गर्न राष्ट्रपतिको सबैलाई आग्रह

काठमाडौं, २८ भदौ - राष्ट्रपति रामचन्द्र पौडेलले मुलुक अहिलेको असहज र भयपूर्ण परिस्थितिबाट कठिन प्रयासपछि शान्तिपूर्ण निकासमा पुगेको बताएका छन् । उनले संविधान सुरक्षित रहेको, संसदीय प्रणाली कायम रहेको र संघीय लोकतान्त्रिक गणतन्त्र जोगिएको स्पष्ट पारेका छन् ।

राष्ट्रपति कार्यालयमार्फत शुक्रबार राति जारी विज्ञप्तिमा उनले छ महिनाभित्र प्रतिनिधिसभा निर्वाचन सम्पन्न गर्ने तयारी भएको जानकारी दिए । उनका अनुसार आगामी फागुन २१ गते नयाँ प्रतिनिधिसभाको निर्वाचन हुनेछ, जसले लोकतन्त्रलाई अझ परिष्कृत र सुदृढ बनाउने अवसर जनताले पाएका छन् ।

राष्ट्रपति पौडेलले भनेका छन्, 'देशको अत्यन्त असहज, विषम र भयपूर्ण परिस्थितिमा कठिन प्रयत्न पश्चात एउटा शान्तिपूर्ण निकास निस्किएको छ। संविधान बचेको छ, संसदीय प्रणाली बचेको छ र संघीय लोकतान्त्रिक गणतन्त्र कायम रहेको छ ।'

उनले सबै पक्षलाई आगामी निर्वाचन सफल पार्न सहयोग गर्न आग्रह गरेका छन् । 'बडो जुक्तिले प्राप्त अवसरको सदुपयोग गर्दै जनता रिझाउने र आफैंमा सम्हालिँदै आगामी फागुन २१ गते हुने चुनाव सम्पन्न गराउने काममा सहयोग गर्न म सबै पक्षलाई हार्दिक अपिल गर्दछु,' विज्ञप्तिमा उल्लेख छ ।