उच्चका ५० र जिल्ला अदालतका १५७ न्यायाधीशको सरुवा

काठमाडौं । न्यायपरिषद्ले उच्च अदालतका ५० जना र जिल्ला अदालतका १५७ जना न्यायाधीशको सरुवा गरेको छ । परिषद्को बिहीबार बसेको बैठकले सरुवासँगै विभिन्न अदालतका प्रमुख पदमा न्यायाधीश तोक्न सिफारिससमेत गरेको हो । 
परिषद्ले विशेष अदालतको अध्यक्षमा उच्च अदालत तुलसीपुरका न्यायाधीश वासुदेव आचार्यलाई सिफारिस गरेको छ । विशेष अदालतका अध्यक्ष रहेका सुदर्शनदेव भट्टलाई उच्च अदालत सुर्खेतमा सरुवा गरिएको छ ।
त्यस्तै, उच्च अदालत पाटन, हेटौंडा इजलासमा कार्यरत न्यायाधीश यमुना भट्टराईलाई उच्च अदालत पोखरा, बागलुङ इजलासमा सरुवा सिफारिस गरिएको छ । उच्च अदालत विराटनगर, धनकुटा इजलासमा कार्यरत न्यायाधीश उद्धवप्रसाद भट्टराईलाई उच्च अदालत पाटनमा सरुवा गरिएको छ । यसैगरी, परिषद्ले श्रम अदालतको न्यायाधीशमा दीपेन्द्र अधिकारीलाई नियुक्तिका लागि सिफारिस गरेको छ । 
राजस्व न्यायाधिकरण काठमाडौंमा पाटन उच्च अदालतका न्यायाधीश ध्रुवराज नन्द, पोखरामा पोखरा उच्चकी अन्जु उप्रेती ढकाल र विराटनगरमा विराटनगर उचच्का दीपेन्द्रबहादुर बमलाई तोक्न सरकारलाई परामर्श दिने निर्णय परिषद्ले गरेको छ ।  
न्यायपरिषद्को निर्णयअनुसार उच्च र जिल्ला अदालतमा गरिएको व्यापक सरुवापछि विभिन्न अदालतमा न्यायाधीशहरूको कार्यविभाजन तथा न्यायिक प्रशासनमा नयाँ जिम्मेवारी निर्धारण हुने भएको छ ।
उच्च अदालत विराटनगरका न्यायाधीश ध्रुवराज चन्द, विष्णप्रसाद अर्याल,  इलाम इजलासबाट किरणकुमार पोखरेल, धनकुटा इजलासबाट उद्धवप्रसाद भट्टराई पाटन उच्च अदालत सरुवा भएको छ । पाटनबाट न्यायाधीश टंकप्रसाद गुरुङको उच्च अदालत विराटनगरको धनकुटा इजलासमा सरुवा भएको छ । पाटन उच्चबाट न्यायाधीश डालकुमार खड्का उच्च अदालत तुलसीपुरको बुटवल इजलास, जनकपुर उच्चको राजविराज इजलासबाट अचुतमकुमार आचार्य र माधव धिताल पाटन उच्च अदालत सरुवा भएका छन् । उच्च अदालत जनकपुरको राजविराज इजलासकी न्यायाधीश सरला मोक्तानको अस्थायी इजलास वीरगंज सरुवा भएको छ ।