दाह्रा काटेपछि धुर्वे निकुञ्जभित्रै

चितवन । आतंक मच्चाएपछि समातेर दाह्रा काटिएको जंगली हात्ती ध्रुर्वे निकुञ्ज क्षेत्रभित्रै बस्न थालेको छ । यो हात्ती हाल चितवन राष्ट्रिय निकुञ्जभित्र बस्दै आएको छ । 
यसले गत असार २० मा एकै परिवारका दुई जनाको ज्यान लिएको थियो । असार ३१ गते राति ध्रुर्वेलाई सुखीभार पोष्ट नजिक डार्ट गरेर बेहोस पार्दै दुई वटा दाह्रा काटिएको थियो । ध्रुर्वेको गलामा आधुनिक रेडियो कलर जडान गरिएको छ । पहिले घाँटीमा रेडियो कलर जडान गरेपछि दाह्रा काटिएको हो । जडान गरिएको रेडियो कलरबाट कहाँ जादैछ, कता पुगेको छ, के गर्दै बसेको छ भन्ने प्रत्येक १० मिनेटमा सूचना संकलन भइरहेको छ । 
दुई दिनअघि चितवन राष्ट्रिय निकुञ्जबाट सीतामाई नजिक जान लागेको भए पनि पुनःफर्किएर चुरेको फेदीतर्फ पुगेको निकुञ्जका सूचना अधिकारी अविनास थापामगरले बताए । बस्ती पसेको सूचना आएमा तुरुन्तै मध्यवर्ती उपभोक्ता समिति, सामुदायिक वन, वडा कार्यालय, स्थानीय टोल लगायतलाई सूचना दिने र सँगै निकुञ्ज सुरक्षा निकायको गस्ती स्थलगत पुगेर निकुञ्जतर्फ धपाउने गरी तयारी गरिएको छ । चितवन निकुञ्जभित्र ४५ देखि ५० वटा हात्ती छन् ।
निकुञ्ज सुरक्षार्थ खटिएको सेनाको नयाँ गोरख गण, निकुञ्जका प्राविधिक कर्मचारी र राष्ट्रिय प्रकृति संरक्षण कोषका प्राविधिकसहितको टोलीले हात्तीलाई रेडियो कलर जडान गरेको हो । गत असार २० गते भरतपुर–२३ मा सोही हात्तीको आक्रमणबाट २५ वर्षीया आशिका बोटे र उनका चार वर्षीय छोरा भरत बोटेको मृत्यु भएपछि निकुञ्जले हात्तीको खोजी र निगरानी बढाएको थियो । प्रतिकूल मौसम र घना झाडीका कारण हात्तीलाई नियन्त्रणमा लिन समय लागेको निकुञ्जले जनाएको छ । निकुञ्जले स्थानीय बासिन्दालाई सचेत रहन, जारी सूचनाको पालना गर्न र जंगली हात्ती देखिए तत्काल सम्बन्धित निकायलाई खबर गर्न आग्रह गरेको छ । रासस