जलस्तर घटेपछि बनबासा पुलमा सवारी आवागमन

महेन्द्रनगर । महाकाली नदीमा जलस्तर घटेपछि पश्चिमी नाका हुँदै भारततर्फको यातायात पुनः सञ्चालनमा आएको छ ।
महाकाली नदीमा पानीको बहाव एक लाख क्युसेक नाघेपछि यहाँको शारदा ब्यारेज (बनबासा पुल) मा चारपांग्रे सवारीसाधनको आवागमनमा रोक लगाइएको थियो । जिल्ला प्रहरी कार्यालय कञ्चनपुरका प्रवक्ता डीएसपी  टेकबहादुर रावतले मंगलबार साँझ महाकाली नदीमा पानीको बहाव ८६ हजार क्युसेक मापन गरिएको जानकारी दिए । ‘दिउँसोसम्म नदीमा पानीको बहाव १ लाख २४ हजार क्युसेकसम्म पुगेको थियो,’ उनले भने, ‘महाकालीमा जलस्तर घटेसँगै बनबासा पुलमा सवारीसाधन सञ्चालन भएको छ ।’ पानीको बहाव बढ्दा मंगलबार बिहानदेखि मोटरसाइकल र पैदल यात्रुलाई आवागमनका लागि खुला गरिए पनि ठूला सवारीसाधन रोकिएका थिए । भारतीय पक्षले एक सय वर्ष पुरानो पुल जीर्ण भएकाले जोखिम हुन सक्ने भन्दै लामो समयदेखि बाढीका बेला चारपांग्रे सवारीसाधन नचलाउन आग्रह गर्दै आएको छ ।