आफ्ना सांसद सम्हाल्दै रास्वपा

काठमाडौं । आफ्ना सांसदहरूलाई संसदमा बोल्नुअघि विषयवस्तु जानकारी गराउन निर्देशन दिएको राष्ट्रिय स्वतन्त्र पार्टीले आफ्ना सांसदहरुलाई निर्वाचन क्षेत्र जाँदा पनि पार्टीसँग समन्वय गर्न भनेको छ । मंगलबार महामन्त्री विपीन आचार्यले विज्ञप्ति जारी गर्दै  नागरिकमाझ जाँदा ‘रणनीतिक समन्वय’ गर्न निर्देशन दिएका छन् । 
सांसदहरूलाई निर्वाचन क्षेत्रमा गरिने भ्रमण राजनीतिक रूपमा प्रभावकारी, संस्थागत र परिणाममुखी बनाउनेगरी पार्टीसँग अनिवार्य समन्वय र सहकार्य गर्न भनिएको छ । ‘राष्ट्रिय स्वतन्त्र पार्टी (रास्वपा)ले बोकेको सुशासन, जवाफदेहिता र नागरिक–केन्द्रित राजनीतिको आधारभूत मर्मलाई संस्थागत गर्न संघीय संसद् र भुइँ तहका नागरिकबीचको जीवन्त संवाद अपरिहार्य छ,’ आचार्यले जारी गरेको विज्ञप्तिमा भनिएको छ, ‘निर्वाचन क्षेत्र तथा जिल्ला नागरिकहरूमाझ केवल औपचारिकता वा व्यक्तिगत जनसम्पर्कमा मात्र सीमित नरही, पार्टीको राजनीतिक दृष्टिकोणलाई विस्तार गर्ने, संगठनलाई ऊर्जावान् बनाउने र जन–अभिमतलाई संसद्को एजेन्डामा रूपान्तरण गर्ने ‘रणनीतिक अभियान’ बन्नुपर्दछ भन्ने पार्टीको स्पष्ट मान्यता छ ।’
सांसदहरुलाई क्षेत्र जान र नागरिकसँग संवाद गर्न भन्दै सभामुख डीपी अर्यालले साउन १४ गते विहान ११ बजेसम्मका लागि संसद् बैठक स्थगन गरेका थिए । असार ३१ गते संसद बैठक स्थगनपछि सांसदहरु जिल्ला जान थालेको ६ दिनपछि रास्वपाले आफ्ना सांसदहरुका लागि यस्तो सूचना जारी गरेको हो । सांसदहरु वर्षे बिदामा आआफ्नो क्षेत्र पुगिसकेका बेला रास्वपाले आफ्नालाई सचेत गराएको हो । 
‘सांसदहरूको प्रभावकारी भूमिका र पार्टी संगठनको चुस्तता एक–अर्काका पूरक हुन् । सुव्यवस्थित र समन्वयात्मक प्रयत्नले मात्र दलको संस्थागत परिपक्वतालाई उचाइमा पु¥याउनेछ,’ रास्वपाले भनेको छ, ‘जनताप्रतिको हाम्रो जवाफदेहितालाई थप कसिलो बनाउनेछ भन्ने कुरा मनन गर्न समेत पुनः दिशानिर्देश गर्दछौं ।’रास्वपामा यसपटक अधिकांश सांसद राजनीतिका क्षेत्रमा नयाँ र युवा छन् । पछिल्लो समय सरकारका निर्णयहरुले रास्वपाले सार्वजनिक रुपमै विरोधको सामना गर्नु परेको छ । यस्तो अवस्थामा निर्वाचन क्षेत्रमा सांसदहरुसँग छलफल, संवादमा तिक्तता आउनसक्ने आकलन पार्टी शीर्ष तहको छ । 
सार्वजनिक अभिव्यक्ति र क्षेत्रगत गतिविधिलाई थप व्यवस्थित बनाउन भन्दै महामन्त्री आचार्य र यसअघि संसदमा बोल्ने विषयमा नियमनका लागि सचेतक क्रान्तिशिखा धितालको निर्देशनलाई लिएर अहिले पार्टीभित्र सांसद व्यवस्थापनको विषय चर्चामा ल्याएको छ । धितालले सांसदहरूलाई संसदमा बोल्नुअघि आफूले उठाउने विषयवस्तु पहिले नै आफू वा अर्का सचेतक प्रकाशचन्द्र परियषरलाई उपलब्ध गराउन निर्देशन दिएकी थिइन् । संसदीय गतिविधिलाई समन्वयात्मक र प्रभावकारी बनाउन यस्तो व्यवस्था गरिएको बताइए पनि त्यसलाई सांसदहरूको अभिव्यक्ति नियन्त्रण गर्ने प्रयासका रूपमा हेरिएको थियो । रास्वपाकै कतिपय सांसदले त्यस्तो आशंका व्यक्त गरेका थिए । 
यसैक्रममा बिहीबार पार्टीका महामन्त्री विपीन आचार्यले अर्को निर्देशन जारी गर्दै सांसदहरूलाई आफ्नो निर्वाचन क्षेत्र वा अन्य कार्यक्रमका लागि बाहिर जानुअघि पार्टीलाई जानकारी गराउन आग्रह गरेका छन् । पार्टीको समन्वय, कार्यक्रम व्यवस्थापन र जनसम्पर्कलाई प्रभावकारी बनाउन यस्तो व्यवस्था आवश्यक भएको उनको भनाइ छ । लगातार जारी भएका यी दुई निर्देशनपछि रास्वपा आफ्नै सांसदहरूको गतिविधि व्यवस्थापनमा चुनौती भोगिरहेको हो कि भन्ने प्रश्न राजनीतिक वृत्तमा उठ्न थालेको छ । विशेषगरी सांसदहरूको सार्वजनिक अभिव्यक्ति, व्यक्तिगत कार्यक्रम तथा क्षेत्रगत गतिविधि पार्टीको आधिकारिक धारणा र रणनीतिसँग बाझिन नदिन नेतृत्वले नियन्त्रणात्मक शैली अपनाउन थालेको टिप्पणी हुन थालेको छ ।
यद्यपि पार्टी नेतृत्वले भने यसलाई अनुशासन र समन्वयका लागि गरिएको सामान्य व्यवस्थापनबाहेक अन्य रूपमा नबुझ्न आग्रह गरेको छ । र संसदीय दल र पार्टीबीच सूचना आदानप्रदानलाई व्यवस्थित बनाउन तथा एकीकृत सन्देश प्रवाह गर्न यस्तो अभ्यास आवश्यक भएको रास्वपाको दाबी छ । तर, आलोचकहरुले भने सार्वभौम मानिने जनप्रतिनिधि सांसदहरूलाई बोल्ने विषयदेखि क्षेत्र भ्रमणसम्म पार्टीलाई जानकारी गराउनुपर्ने निर्देशन आउनुलाई नेतृत्व र सांसदबीच समन्वय कमजोर भएको संकेतका रुपमा टिप्पणी गरेका छन् ।